ކީރިތި ޤުރްއާން ކިޔަން ދަސްކުރުމާއި، ކީރިތި ޤުރްއާން ކިޔަވަން ދަސްކުރުމުގެ ތަފާތު
ކީރިތި ޤުރްއާން ކިޔަން ދަސްކުރުމާއި، ކީރިތި ޤުރްއާން ކިޔަވަން ދަސްކުރުމަކީ، ވަރަށް ތަފާތު ދެކަމެކެވެ.
ކީރިތި ޤުރްއާން ކިޔުމަކީ، ބަސްތަކެއް އަނގައިން އެކުލަވާލާ ގޮތަށް، ހަމައެކަނި ކިޔާލުމެވެ. ކީރިތި ޤުރްއާން ކިޔަން ދަސްކުރުމަކީ، ނަމޫނާ ކިޔެވުމެއްގެ އަޑު އަހައިގެން، ހަމައެކަނި ބަސްތަކެއް އަނގައިން އެކުލަވާލާ ގޮތަށް، ޤުރްއާން ކިޔަން ދަސްކުރުމެވެ. މިއީ ޢާންމުކޮށް ކީރިތި ޤުރްއާން ބާވާއިލެއްވުނު ދުވަސްވަރު، ކީރިތި ޤުރްއާން ކިޔަވަން ދަސްކުރުމުގައި، އިޚްތިޔާރުކުރި ގޮތެވެ. މިގޮތަށް ކީރިތި ޤުރްއާން ކިޔަން ދަސްކުރުމުގައި، އޭރު ޢާންމުކޮށް އިސްކަން ދެވުނީ، އަޑު އަހައިގެން ހަމައެކަނި، ހިތު ދަސްކުރުމަށެވެ. ނަމަވެސް، އެއީ މިހާރުގެ ޙާލަތާ އެކަށީގެންވާ ރަނގަޅު ގޮތެއް ނޫނެވެ. އެއީ ޢަރަބި ބަހުން ވާހަކަ ދައްކާ، ޢަރަބިންނަށް ޚާއްޞަ ގޮތެކެވެ.
ކީރިތި ޤުރްއާން ކިޔަވަން ދަސްކުރުމަކީ، ތަޖުވީދުގެ ޤަޥާޢިދުތަކާ އެއްގޮތަށް، އަދި އިޚްތިޔާރުކުރެވޭ ޞައްޙަ ރިވާޔަތާ އެއްގޮތަށް، ކީރިތި ޤުރްއާން ބިނާވެފައިވާ ތަރުތީބުން، ރީތިކޮށް ރާގަށް، ބަލައިގެން އަދި ނުބަލައި ކިޔަވަން ދަސްކުރުމެވެ. މިއީ މިހާރު، ކީރިތި ޤުރްއާން ކިޔަވަން ދަސްކުރަން ޖެހޭ ގޮތެވެ. މިއީ ޢަރަބި ނޫން މީހުންނަށް ޚާއްޞަ ގޮތެކެވެ.
ޚުލާޞާ:-
ކީރިތި ޤުރްއާނަކީ ޢަރަބި ބަހުން އޮތް ފޮތެކެވެ. އަދި ކީރިތި ޤުރްއާން ބާވައިލެއްވުނު ދުވަސްވަރު، ކީރިތި ޤުރްއާން އެންމެ ބޮޑަށް ޢާންމުވީ ޢަރަބިންގެ ތެރޭގައެވެ. އެކަމުގެ ސަބަބުން، ޤުރްއާން ކިޔަން ދަސްކުރުމުގައި، އެ ޒަމާނުގައި، ބޮޑަށް އިސްކަން ދެވުނީ، ކީރިތި ޤުރްއާން ކިޔަވަން ޖެހޭ ގޮތަށް ( ތަޖުވީދުގެ ޤަޥާޢިދުތަކާ އެއްގޮތަށް ) ހަމައެކަނި ކިޔުމަށެވެ. ކީރިތި ޤުރްއާން ކިޔަވަން ދަސްކުރަންޖެހޭ ގޮތާއި ތަރުތީބާ ގުޅޭ ގޮތުން، އެ ދުވަސްވަރު އެހާ ބޮޑަށް މަޝްވަރާ ނުކުރެވި އޮތް އެންމެ ބޮޑު ސަބަބަކީ، އޭރު ޢަރަބީން ގިނަވުމާއި ހިތު ދަސްކުރުމަށް، އިސްކަން ދިނުމެވެ. އެކަމުގެ ސަބަބުން، އޭރު ބޮޑަށް އިސްކަންދެވުނީ، ހަމައެކަނި ޤުރްއާން ކިޔަން ދަސްކުރުމަށެވެ. ކިޔަވަން ދަސްކުރުމަކަށް ނޫނެވެ. މިކަމުގެ އެންމެ ބޮޑު ހެއްކަކީ، ކީރިތި ޤުރްއާން އެއްފޮތަކަށް ޖަމާކުރުމާއެކު، ކީރިތި ޤުރްއާނުގެ ރަސްމަށް، އެކި ދުވަސްވަރު ގެނެވުނު އެކި ބަދަލުތަކެވެ.
މިހުރިހާ މަރުޙަލާތަކެއް ފުރިހަމަވެ ނިމުނު އިރުވެސް، ކީރިތި ޤުރްއާން ކިޔަވަން ދަސްކުރަންޖެހޭ ގޮތާއި ތަރުތީބާ ގުޅޭ ގޮތުން، އެއްވެސް މިންވަރަކަށް، ދިރާސާ ކުރުމަށް، ފުރުޞަތު ނުލިބި އޮތް އެންމެ ބޮޑު ސަބަބަކީ، ޢަރަބި ނޫން މީހުން، ޢަރަބީންގެ ތެރޭގައި، އެންމެ ކުރީގައި، ޤުރްއާން ކިޔަވަން ދަސްކުރުމަށް، އިސްކަންދިން ގޮތަށް، މިހާރުވެސް އިސްކަން ދިނުމެވެ. އަދި ކީރިތި ޤުރްއާން ކިޔަވަން ދަސްކުރުމުގައި ޢަރަބީން، ކީރިތި ޤުރްއާން އުނގެނި ދަސްކުރި ގޮތާއި ދަސްކުރާ ގޮތް ނަމޫނާއަކަށް ބެލުމެވެ.
ލިޔުނީ:- ޝުޢައިބު ޢަލީ