ކަނުލައި އަޑުއެހުމެއްނެތި، ތަޖުވީދުގެ ހަމަތަކާ އެއްގޮތަށް، ކީރިތި ޤުރްއާން ކިޔަވަން ދަސްކުރުމަކީ، ވަޤުތީ ދަސްކުރުމެއް
އަޅުގަނޑުމެންގެ ތެރެއިން، ވަރަށް ގިނަ މީހުންނަށް ހީވެފައި އޮންނަނީ، ކީރިތި ޤުރްއާން ކިޔަވަން ދަސްކުރުމަކީ، ހަމައެކަނި ކިޔެވުން ކަމަށެވެ. އެހެންވެ ގިނަ ބެލެނިވެރިން ބޭނުންވަނީ ވެސް، ދަރިވަރުން ލައްވާ އަބަދުވެސް ކިޔުއްވުމަށެވެ. ކަނުލައި އަޑުއެހުމަށް އިސްކަމެއް ނުދެއެވެ.
ނަމަވެސް އެއީ ކުށް ހީއެކެވެ.
ކީރިތި ޤުރްއާން ކިޔަވަން ދަސްކުރުމުގައި، ކަނުލައި އަޑު އެހުން އުނިވެއްޖެނަމަ، ތަޖުވީދުގެ ހަމަތަކާ އެއްގޮތަށް، ކީރިތި ޤުރްއާން ކިޔަވަން ދަސްވުމަކީ ވަރަށް ދުރުކަމެކެވެ. ކީރިތި ޤުރްއާން ކިޔަވަން ދަސްކުރަން ބޭނުން ނަމަ، އަދި ޤާބިލު އެދުރަކަށް ވާން ބޭނުންވާނަމަ، އަދި ގިނަދުވަހު ހަނދާނުގައި ހަރުލެއްވޭ ގޮތަށް، ކީރިތި ޤުރްއާން އުނގެނި ދަސްކުރަން ބޭނުންވާނަމަ، އަބަދުވެސް އިސްކުރަންޖެހޭނީ، ތަކުރާރުކޮށް ކަނުލައި އަޑުއެހުމެވެ. އެއަށްފަހު، ކަނުލައި އަޑު އެހި މިންވަރު، ތަކުރާރުކޮށް ކިޔުމެވެ. ތަކުރާރުކޮށް ކަނުލައި އަޑު އެހުމާއި، ތަކުރާރުކޮށް ކިޔުން ވަކި ނުކުރެވޭނެއެވެ.
ކީރިތި ޤުރްއާން ކިޔެވުން ބިނާވެފައިވަނީ، އަޑުގެ ވަރަށް ގިނަ ޞިފަކުރުންތަކެއްގެ މައްޗަށެވެ. ވީމާ ކީރިތި ޤުރްއާން ކިޔަވަން ދަސްކުރުމުގައި، ކަނުލައި އަޑު އެހުމަކީ، ލާޒިމުކަމެކެވެ. އެއީ ކީރިތި ޤުރްއާނަށް ޢަމަލުކުރުމުގައި، އަޑު އަހައި ކިޔަމަންވާ ފަދައިންނެވެ. ކިޔާކިޔުން ޞިފަކުރަން ދަސްކޮށް ފަރިތަކޮށް އާދަކުރެވޭނީ، ކަނުލައި އަޑު އަހައިގެންނެވެ. އެގޮތުން، ކީރިތި ޤުރްއާން ކިޔަވަން ދަސްކުރުމުގައި، ކަނުލައި އަޑުއެހުން ބިނާވެފައިވަނީ ތިން އެހުމެއްގެ މައްޗަށެވެ.
1- ނަމޫނާ ކިޔެވުން ( މުދައްރިސްގެ ކިޔެވުން ) ކަނުލައި އަޑުއެހުން.
2- އެހެން ދަރިވަރުންގެ ކިޔެވުން ކަނުލައި އަޑުއެހުން.
3- އަމިއްލަ ކިޔެވުން ކަނުލައި އަޑުއެހުން.
ކީރިތި ޤުރްއާން ކިޔަވަން ދަސްކުރާއިރު، ނަމޫނާ ކިޔެވުންވެސް ކަނުލައި އަޑުއެހުމަށް، ގިނަ ދަރިވަރުން ބޭނުމެއް ނުވެއެވެ. ބޭނުންވަނީ ހަމައެކަނި، މުދައްރިސާއެއްކޮށް ތަކުރާރުކޮށް ކިޔަވާށެވެ. ޚާއްޞަކޮށް އެހެން ދަރިވަރުންގެ ކިޔެވުން އަޑު އެހުމަކީ، ގިނަ ދަރިވަރުންނަށް ވަރަށް އުނދަގޫ ކަމެކެވެ. ނަތީޖާއެއްގެ ގޮތުން، އަމިއްލަ ކިޔެވުން ކަނުލައި އަޑު އަހައިގެން، ރަނގަޅަށް ކިޔަވާއިރު ކިޔޭ ގޮތާއި ގޯސްކޮށް ކިޔާއިރު ކިޔޭގޮތުގެ ތަފާތު ނަގައިގަންނަން، ދަރިވަރުންނަށް އުނދަގޫވެއެވެ. އަދި ކީރިތި ޤުރްއާން ކިޔަވަން، ދަސްކޮށް ފަރިތަކޮށް އާދަކުރުމަށް ހުރަސްއެޅެއެވެ.
ލޮބުވެތި ބެލެނިވެރިންނޭވެ.
ކީރިތި ޤުރްއާން ކިޔަވަން ދަސްކޮށްދެވޭނީ، ކިޔާ ދޫތަކަށެވެ. އަހާ ކަންފަތްތަކަށެވެ. ވިސްނައި ފިކުރުކުރާ ބަޔަކަށެވެ. އެކަންކަން ކުރެވޭނީ، ކިޔަވާ ހިތުން ކިޔަވަން އަންނަ ނަމައެވެ. ދަރިވަރުން އެ މިންވަރަށް ތައްޔާރުކޮށްދިނުމަކީ، ބެލެނިވެރިންގެ ޒިންމާއެކެވެ. އެއީ ކީރިތި ޤުރްއާނަށްޓަކައި ދެވޭ އެންމެ ފުރަތަމަ ތަރުބިއްޔަތެވެ. ނިދި ހަމަނުކޮށް ނުވަތަ ވަކި ގޮތަކަށް ކިޔަވަން ދަސްކޮށްދިނުމަށްފަހު، ކިޔެވުން އިޞްލާޙުކުރަން މުދައްރިސުންނާ ޙަވާލުކުރިޔަސް، އެކަމެއް ނުވާނެއެވެ.
ލިޔުނީ:- ޝުޢައިބު ޢަލީ