وَاوْ އަދާކުރުމުގައި، ހުރިހާ ޙާލަތެއްގައި ދެ ތުންފަތް ވަށް ކުރަން ޖެހޭނެތަ؟

وَاوْ އަދާކުރުމުގައި، ހުރިހާ ޙާލަތެއްގައި ދެ ތުންފަތް ވަށް ކުރަން ޖެހޭނެތަ؟

– وَاوْ އަދާކުރުމުގައި، އެކި ޙާލަތްތަކުގައި، ދެ ތުންފަތް ވަށްކުރެވޭ ވަޤުތު ތަފާތުވާނެއެވެ.

– وَاوْ އަދާކުރުމުގައި ދެ ތުންފަތް ވަށްކުރެވޭ ވަޤުތު ބެހެނީ ދެ ބަޔަކަށެވެ.

1- وَاوْ ކިޔަން ފެށުމުގެ ކުރިން ދެތުންފަތް ވަށް ކުރުން.

2- وَاوْ ކިޔާ ވަޤުތު ދެ ތުންފަތް ވަށްކުރުން.

وَاوْ ކިޔަން ފެށުމުގެ ކުރިން ދެތުންފަތް ވަށް ކުރުން

– وَاوْ ކިޔަން ފެށުމުގެ ކުރިން ދެތުންފަތް ވަށް ކުރަން ޖެހޭނީ، އަބަފިލި އަދި އިބިފިލީގެ ޙާލަތުގައެވެ.

– وَاوْ ކިޔުމުގައި، އަބަފިލި އަދި އިބިފިލީގެ ޙާލަތުގައި، وَاوْ ކިޔަން ފެށުމުގެ ކުރިން ދެތުންފަތް ވަށް ކުރުމުން ފުދޭނެއެވެ.

– މާނައަކީ، وَاوْ ގައި އަބަފިލި އަދި އިބިފިލި ޖެހުމުން،  وَاوْ ކިޔާ ވަޤުތު ދެތުންފަތް ވަށްކުރާކަށް ނުޖެހޭނެއެވެ.

– ސަބަބަކީ، މި ދެ ޙާލަތުގައި، ފިލީގެ އަޑުގެ މިސްރާބުގެ ސަބަބުން، وَاوْ ކިޔާ ވަޤުތު، ދެތުންފަތް ވަށްކުރުމަށް ފުރުޞަތު ނުލިބޭނެތީއެވެ.

– އެހެންވީމަ އަބަފިލި އަދި އިބިފިލީގެ ޙާލަތުގައި، وَاوْ ކިޔާ ވަޤުތު، ދެތުންފަތް ވަށްކުރުމަށް، މަސައްކަތް ކުރުމަކީ، އެއްގޮތަކަށް ވެސް ރަނގަޅު ގޮތެއް ނޫނެވެ.

– އެކަމުގެ ސަބަބުން، ޤުރްއާން ކިޔަވަން ވަރަށް އުނދަގޫވާނެއެވެ.

وَاوْ ކިޔާ ވަޤުތު ދެ ތުންފަތް ވަށްކުރުން

– وَاوْ ކިޔާ ވަޤުތު، ދެ ތުންފަތް ވަށްކުރަން ޖެހޭނީ، އުބުފިލި އަދި ސުކުންގެ ޙާލަތުގައެވެ.

– وَاوْ ކިޔުމުގައި، އުބުފިލީގެ ޙާލަތުގައި، وَاوْ ކިޔާ ވަޤުތު ދެތުންފަތް ވަށްކުރުން ފެށޭނީ، ދެތުންފަތް ވަށްކުރުމާއި ދެތުންފަތް އޫކުރުން ޖަމާވެގެންނެވެ.

– އަބަފިލި އަދި އުބުފިލި ޖެހޭ ޙާލަތްތަކުގައި، އަދާކުރެވޭ ގޮތާ ޚިލާފަށް، މި ޙާލަތުގައި، وَاوْ ކިޔާ ވަޤުތު ދެތުންފަތް ވަށްކުރުން ދެމިގެންދާނެއެވެ.

– މިގޮތަށް ދިމާވާ ސަބަބަކީ، އުބުފިލި އަދާކުރުމުގައި، ދެތުންފަތް އޫކުރެވޭތީއެވެ.

– وَاوْ ގައި އުބުފިލި ޖެހޭ ޙާލަތުގައި، ދެތުންފަތް ވަށްކުރުމަށްވުރެ ބޮޑަށް އިސްކަން ދޭންޖެހޭނީ، ދެތުންފަތް އޫކުރުމެވެ.

– އެހެންވީމަ وَاوْ ގައި، އުބުފިލި ޖެހޭ ޙާލަތުގައި އަދާކުރެވޭނީ، ދެތުންފަތް ވަށްކުރުމާއި ދެތުންފަތް އޫކުރުން ޖަމާވެގެންނެވެ.

–  މި ޙާލަތުގައި ދެތުންފަތް ވަށްކުރުމާއި އޫކުރުން ވަކި ކުރުމަކީ، ކުރެވޭނެ ކަމެއް ނޫނެވެ.

– ސުކުންގެ ޙާލަތުގައި، وَاوْ ކިޔުމުގައި، ދެތުންފަތް ވަށްކުރުން ފެށޭނީ، وَاوْ ކިޔާ ވަޤުތުގައެވެ.

– ނަމަވެސް وَاوْ ގައި، ސުކުން ކުރެވޭ ޙާލަތުގައި އަދާކުރެވޭނީ، ހަމައެކަނި ދެތުންފަތް ވަށްކޮށްގެންނެވެ.

– މިޙާލަތުގައި ދެތުންފަތް އޫކޮށްގެން ނުވާނެއެވެ.

– وَاوْ ގައި، ސުކުން ކުރެވޭ ޙާލަތޭ ބުނާ ބަހުގެ މާނައަކީ، މައްދު وَاوْ ގެ ޙާލަތް ފިޔަވައި، ސުކުން ކުރެވޭ އެހެން ޙާލަތްތަކެވެ.

– މައްދު وَاوْ ގެ ޙާލަތަކީ، އަޞްލު ސުކުން އަކުރުގެ ޙާލަތެއް ނޫނެވެ.

ޚުލާޞާ

– وَاوْ އަދާކުރުމުގައި، ދެ ތުންފަތް ވަށްކުރަން ޖެހޭނެއެވެ.

– ނަމަވެސް އެކި ޙާލަތްތަކުގައި، ދެތުންފަތް ވަށް ކުރެވޭ ވަޤުތާއި މިންވަރު ތަފާތުވާނެއެވެ.

– وَاوْ އަދާކުރުމުގައި، ދެތުންފަތް ވަށް ކުރެވޭ ވަޤުތާއި މިންވަރު ތަފާތުކުރެވޭ ޙާލަތްތައް ބެހެނީ، ހަތަރު ބަޔަކަށެވެ. އެއީ

1- وَاوْ ގައި އަބަފިލި ޖެހޭ ޙާލަތް

2- وَاوْ  ގައި އިބިފިލި ޖެހޭ ޙާލަތް

3- وَاوْ ގައި އުބުފިލި ޖެހޭ ޙާލަތް

4- وَاوْ ގައި ސުކުން ކުރެވޭ ޙާލަތް

ލިޔުނީ:- ޝުޢައިބު ޢަލީ