ސްކްރީނަށް ދެވިހިފުމުގެ ސަބަބުން، ކީރިތި ޤުރްއާން ބަލައިގެން ކިޔަވަން ދަސްކުރުމަށް ހުރަސް އެޅޭނެތަ؟
ސްކްރީނަށް ދެވިހިފުމުގެ ސަބަބުން، ކީރިތި ޤުރްއާން ބަލައިގެން ކިޔަވަން ދަސްކުރުމަށް، މައިގަނޑު ތިން ގޮތަކުން ހުރަސްއެޅޭނެއެވެ. އެއީ…………
1- ކީރިތި ޤުރްއާން ބަލައިގެން ކިޔެވުމަށް ފޫހިވުން.
2- ކީރިތި ޤުރްއާން ބަލައިގެން ކިޔެވުމުގައި، އަމިއްލަ އިޚްތިޔާރުން، ޒިންމާ ނަގަން ފޫހިވުން.
3- ތަޖުވީދުގެ ހަމަތަކާ އެއްގޮތަށް، ކީރިތި ޤުރްއާން ކިޔެވުމުގައި، ދުލުގެ ޙަރަކާތަށް ނުފަރިތަވުން.
ސްކްރީނަށް ދެވި ހިފުމަކީ، ކީރިތި ޤުރްއާން ބަލައިގެން ކިޔަވަން ދަސްކުރުމަށް، އެޅިގެންދިޔަ ވަރަށް ބޮޑު ހުރަހެކެވެ. ކީރިތި ޤުރްއާން ކިޔަވަން ދަސްކުރުމުގައި، މީގެ ވިހި އަހަރު ކުރިއަށް ޖެހިލާއިރު، އޭރުގެ ދަރިވަރުންނަށް ޤުރްއާނުން ދަސްކޮށްދޭ ފިލާވަޅު، މުދައްރިސުން އެއް ފަހަރު ނުވަތަ ތިން ފަހަރު ކިޔައިދިނުމަށްފަހު، ގެއަށް ފޮނުވާލުމުން، ވަރަށް ގިނަ ދަރިވަރުން އަންނަނީ، އަމިއްލައަށް ފިލާވަޅު ދަސްކޮށް ފަރިތަކޮށް އާދަކޮށްގެންނެވެ. އަޅުގަނޑުމެން ކުޑައިރު، ކީރިތި ޤުރްއާން ކިޔަވަން ދަސްކުރި އިރު ވެސް، ފިލާވަޅު ދަސްކުރުން ކުރިއަށް ދަނީ، ހަމަ އެގޮތަށެވެ. އެދުރު މީހާ މާގިނައިން ކިޔައިދޭކަށް ނުޖެހެއެވެ. ފިލާވަޅުތައް ދަސްކުރާ ވަރަކަށް، ޖެހިގެން އޮތް ފިލާވަޅަށް، ވަރަށް ބޮޑަށް ތައްޔާރުވުމަށް، ފުރުޞަތު ލިބެއެވެ. އެކަމުގެ ސަބަބުން، ދުވަސްވާ ވަރަކަށް، ޤުރްއާން ފިލާވަޅު ދަސްކުރުމަށް، ނަގާ ވަޤުތު މަދުވެއެވެ.
ނަމަވެސް މިހާރު މިގޮތަށް މިކަން ނުހިނގައެވެ.
މުދައްރިސުން ތަކުރާރުކޮށް ކިޔައިދޭއިރުވެސް، ދަރިވަރުން ތިބެނީ، އެހެން ދުނިޔެއެއް ގައެވެ. ސްކްރީނުން ޙަރަކާތް ކުރާ މަންޒަރުތަކަށް، ތަކުރާރުކޮށް ބެލުމުގެ ސަބަބުން، ދަރިވަރުން ތިބެނީ، ލިޔެފައިވާ ލިޔުމަކަށް ބަލައިގެން، ކިޔެވުމަށް ފޫހިވެފައެވެ. ސަބަބަކީ ލިޔެފައިވާ ލިޔުމަކުން، ޙަރަކާތް ކުރާތަން ނުފެންނާތީއެވެ. ސްކްރީނަށް ދެވި ހިފުމުގެ ސަބަބުން، ދަރިވަރުންގެ ލޯ އެދޭނީ، ޙަރަކާތް ކުރާ މަންޒަރު ތަކަށެވެ. ޙަރަކާތް ނުކުރާ މަންޒަރުތަކަށް ބެލުމަކީ، ދަރިވަރުންގެ ލޯ އެދޭ ކަމެއް ނޫނެވެ. އެކަމުގެ ސަބަބުން، ކީރިތި ޤުރްއާން ބަލައިގެން ވަކި ތަރުތީބަކުން ކިޔެވުމަކީ، އެފަދަ ދަރިވަރުންނަށް، ވަރަށް ދަތިކަމަކަށް ވެގެންދެއެވެ. އެކަމުގެ ސަބަބުން، ބައެއް ބެލެނިވެރިން ހަދާގޮތަކީ، އޯޑިއޯއެއް އިއްވައިގެން، ދަރިވަރުންނަށް، ކީރިތި ޤުރްއާން ހިތު ދަސްކޮށްދޭން މަސައްކަތް ކުރަނީއެވެ. ނަމަވެސް އެއީ، މި މައްސަލައިގެ ޙައްލެއް ނޫނެވެ. އެއީ ކަންފަސޭހަކޮށް، މި މައްސަލަ އިތުރަށް ގޯސްކުރުމެވެ.
ސްކްރީނަށް ދެވި ހިފުމުގެ ސަބަބުން، ކީރިތި ޤުރްއާން އުނގެނި ދަސްކުރުމުގައި، ދިމާވާ އަނެއް މައްސަލައަކީ، ލިޔެފައިވާ ލިޔުމެއް ބަލައިގެން ކިޔެވުމުގައި، ދަރިވަރުން އިޚްތިޔާރާއި ޒިންމާއަށް ފަރުވާ ކުޑަވުމެވެ. އެފަދަ ކުދިންނަށް، ކީރިތި ޤުރްއާން ބިނާވެފައިވާ ތަރުތީބުން، އަކުރުން އަކުރަށް ކަލިމައިން ކަލިމައަށް އަދި އާޔަތުން އާޔަތަށް، ވަކި ތަރުތީބަކުން ލޯ ހިންގުމަކީ، ވަރަށް ދަތިކަމަކަށް ވެއެވެ. އެހެންވެ އެކުދިން ވެސް، ކަން ފަސޭހަކުރުމަށް، ކީރިތި ޤުރްއާން ހިތު ދަސްކުރަން މަސައްކަތް ފަށައެވެ. ސަބަބަކީ ކީރިތި ޤުރްއާން ހިތު ދަސްކުރުމުގައި، އުނގެނި ދަސްކުރުން ލާޒިމު ނުވާތީއެވެ. އަދި އަމިއްލަ ޒިންމާތައް މަދުވާތީއެވެ.
ނަމަވެސް ޢިލްމީ ގޮތުން ބަލާއިރު އެފަދަ ދަރިވަރުންގެ މިސާލަކީ، ލޯ އަނދިރި މީހެއްގެ މިސާލެވެ. ކީރިތި ޤުރްއާނަށްޓަކައި، އެފަދަ ކުދިންނަކީ، ލޯ އަނދިރި ބައެކެވެ. އެހެންވީމަ ބަލައިގެން ޤުރްއާން ކިޔަވަން ފަރުވާ ކުޑަ ކުއްޖަކު، ނުބަލައި ކިޔަވަން އިސްކަންދޭނަމަ، އެއީ އުފާކުރަން ޖެހޭ ވަރުގެ ކަމެއް ނޫނެވެ. ޙަޤީޤަތުގައި އެފަދަ ކުދިން މަޑުމަޑުން ބަދަލުވަމުން އެދަނީ، ނުކުޅެދޭ ބަޔަކަށެވެ. އުފާކުރަންވީ ބަލއިގެން ކިޔަވަން ދަސްކޮށް ފަރިތަކޮށް އާދަކުރުމުގެ ސަބަބުން، ނަތީޖާއެއްގެ ގޮތުން، ދަރިވަރުންނަށް ނުބަލައި ކިޔަވަން ދަސްވާނަމައެވެ.
ސްކްރީނަށް ދެވި ހިފުމުގެ ސަބަބުން، ކީރިތި ޤުރްއާން އުނގެނި ދަސްކުރުމުގައި، ދިމާވާ މައްސަލަތަކުގެ ތެރެއިން، ދުލުގެ ޙަރަކާތަށް ކަންނެތް ވުން ވެސް ހިމެނެއެވެ. ގިނައިރު ސްކްރީނަށް ބަލާނަމަ، ދަރިވަރުންނަށް ފެންނާނީ މަންޒަރެވެ. ވާހަކަ ދައްކާނީ އެއްކޮޅުންނެވެ. ދަރިވަރުން ތިބޭނީ، ހަމައެކަނި މަންޒަރު ބަލައި އަޑު އަހާށެވެ. އެކަމުގެ ސަބަބުން، ވާހަކަ ދެއްކުމަށާއި ކީރިތި ޤުރްއާން ކިޔެވުމަށް، ދޫ ކަންނެތް ވެގެންދާނެއެވެ. ތަޖުވީދުގެ ހަމަތަކާ އެއްގޮތަށް، ކީރިތި ޤުރްއާން ކިޔެވޭނީ، ތަކުރާރުކޮށް ވަކި ގޮތަކަށް ކިޔަވައިގެންނެވެ. ނަމަވެސް ގިނައިރު ސްކްރީނަށް ބަލާ ކުދިންނަށް، ޤުރްއާނުން ދަސްކުރާ ފިލާވަޅު، އެއް ފަހަރަށްވުރެ ގިނައިން ކިޔަން ޖެހުމުން، އެއީ ވަރަށް ބުރަ އުނދަގޫ ކަމަކަށް ވެގެންދެއެވެ.
މި މައްސަލައިގެ ޙައްލަކީ، ދަރިވަރުން ސްކްރީނާ ދުރުކުރުމެވެ. ކީރިތި ޤުރްއާނަށްޓަކައިވެސް ބެލެނިވެރިން މިކަން ކުރަންޖެހެއެވެ. މިކަން މިގޮތަށް ޙައްލުކުރުމުގެ ބަދަލުގައި، ގިނަ ބެލެނިވެރިން ހަދާގޮތަކީ، ދަރިވަރުންނަށް ކީރިތި ޤުރްއާން ހިތު ދަސްކޮށްދެނީއެވެ. ދަރިވަރުން ސްކްރީނަށް ބެލުމުގައި، ގިނަ ވަޤުތު ހޭދަކުރަނީ ވެސް، ބެލެނިވެރިން ކަންފަސޭހަކުރުމުގެ ސަބަބުންނެވެ. އަދި އެކަމުގެ ސަބަބުން، ކީރިތި ޤުރްއާން ބަލައިގެން ކިޔަވަން އުނދަގޫވުމުން، އިތުރަށް ކަންފަސޭހަކުރުމަށް، ހިތު ދަސްކޮށްދެނީއެވެ. ނިކަން ވިސްނާށެވެ. ކަމުގެ ޢިލްމާއި ތަރުބިއްޔަތު ލިބިފައި ނެތް މައިންބަފައިންގެ ސަބަބުން، ދަރިން ބަދަލުވެގެން އެދަނީ، ނުކުޅެދޭ ކުދިންނަށެވެ. ދަރިން ހަލާކުވެގެން އެދަނީ، ބެލެނިވެރިން ކޮންމެ ކަމެއްގައި، ކަންފަސޭހަ ކުރުމުގެ ސަބަބުންނެވެ.
މިކަމާމެދު ވިސްނައި ފިކުރުކޮށްލާނެ ހަމަ އެކަކުވެސް ނެތީ ހެއްޔެވެ؟ މިގޮތަށް ކަންފަސޭހަކުރުމަކީ، ހުރިހާ ކަމެއްގެ ޙައްލު ހެއްޔެވެ؟
ލިޔުނީ:- ޝުޢައިބު ޢަލީ