ކީރިތި ޤުރްއާން ކިޔަވަން ދަސްކުރާ މީހުން، އެއް ފެންވަރަކަށް ގެންނާނީ ކިހިނެއް؟
ކީރިތި ޤުރްއާން އުނގަންނައިދިނުމުގައި، ހަމައެކަނި އަޑު ދަށުން ކިޔުއްވައިގެން، ނުވަތަ މުދައްރިސާ އެއްކޮށް ތަކުރާރުކޮށް ކިޔުއްވައިގެން، ކީރިތި ޤުރްއާން އުނގެނި ދަސްކުރާ ހުރިހާ އެންމެން، އެއް ފެންވަރަކަށް ނުގެނެވޭނެއެވެ. އެގޮތަށް އެކަން ނުކުރެވޭނެކަމީ ޔަޤީން ކަށަވަރު ކަމެކެވެ.
ކީރިތި ޤުރްއާން ކިޔަވަން ދަސްކުރާ އެންމެންނަކީ، ފެންވަރުގެ ގޮތުން ހަމަހަމަ ބައެއް ނޫނެވެ. އެހެންވީމަ އެކި މީހުންނަށް ކުރިއެރުން ލިބޭ ގޮތާއި، ކުރިންއެރުން ލިބޭ މިންވަރުވެސް ތަފާތުވާނެކަން، މުދައްރިސުންނާއި ބެލެނިވެރިންވެސް، ޤަބޫލުކުރަން ޖެހޭނެއެވެ.
ފެންވަރުގެ ގޮތުން ތަފާތު ބަޔަކަށް، ކީރިތި ޤުރްއާން އުނގަންނައި ދިނުމުގައި، ހަމަހަމަކުރުމަކީ، އެންމެ ދަށް މީހާގެ ފެންވަރުން، ފެންވަރުގެ ގޮތުން އެންމެ މޮޅު ރަނގަޅު މީހާގެ ފެންވަރަށް، ވާޞިލު ވެވޭ ގޮތަށް، އުނގަންނައިދިނުން ތަރުތީބުކުރުމެވެ. އޭގެ ބަދަލުގައި، ހަމައެކަނި، އެންމެ ފެންވަރު ރަނގަޅު މީހާގެ ފެންވަރުން، އުނގަންނައި ދިނުން ބިނާކުރާނަމަ، އުނގަންނައި ދިނުމުގައި، ފެންވަރުގެ ގޮތުން ހަމަހަމައެއް ނުކުރެވޭނެއެވެ. އަދި އެއީ އުނގަންނައި ދިނުމުގައި، ޢަދުލުވެރިވުމެއް ވެސް ނޫނެވެ.
ފެންވަރުގެ ގޮތުން ތަފާތު ބަޔަކަށް އުނގަންނައިދޭ ނަމަ، އެންމެ ފުރަތަމަ ކުރަންޖެހޭ ކަމަކީ، ވަކި ތަރުތީބަކުން، އެންމެން ވެސް އެއް ފެންވަރަކަށް ގެނައުމަށް މަސައްކަތް ކުރުމެވެ. އެކަން ފުރިހަމަ ކުރުމަށް، އުނގަންނައި ދިނުން ފަށަން ޖެހޭނީ، ފެންވަރުގެ ގޮތުން އެންމެ ދަށް މީހާގެ ފެންވަރުންނެވެ. ކީރިތި ޤުރްއާން ބިނާވެފައިވަނީ، އެގޮތަށް ކިޔަވަން ދަސްކުރެވޭ ގޮތަށެވެ. ކީރިތި ޤުރްއާން ބިނާވެފައިވަނީ، އަކުރުން އަކުރަށް، ކަލިމައިން ކަލިމައަށް، އާޔަތުން އާޔަތަށް އަދި ސޫރަތުން ސޫރަތަށް، އުނގަންނައިދިނުން ތަރުތީބުކުރެވޭ ގޮތަށެވެ. އެގޮތަށް އުނގަންނައިދިނުން ތަރުތީބުކުރުމުގެ ސަބަބުން، ފެންވަރުގެ ގޮތުން ދަށް މީހުންނާއި، ފެންވަރުގެ ގޮތުން އެންމެ މޮޅު މީހުން، އުނގަންނައިދިނުމުގައި ހަމަހަމަކުރެވި، އުނގެނޭ މީހުންގެ ފެންވަރު، އެކުއެކީގައި އިތުރަށް ރަނގަޅު ކުރުމަށް ފުރުޞަތު ލިބޭނެއެވެ.
ކީރިތި ޤުރްއާން ކިޔަވަން ދަސްކުރާ މީހުން، އެއް ފެންވަރަކަށް ގެނައުމުގައި، އުނގެނޭ މީހުން ބެހެނީ ދެ ބަޔަކަށެވެ.
1- ހަމައެކަނި ބަލައިގެން ކިޔަވަން ދަސްކުރާ މީހުން.
2- ބަލައިގެން ކިޔަވަން ދަސްކުރުމާއެކު، ނުބަލައި ކިޔަވަން ދަސްކުރާ މީހުން.
ހަމައެކަނި ބަލައިގެން ކީރިތި ޤުރްއާން ކިޔަވަން ދަސްކުރާ މީހުން، ފެންވަރުގެ ގޮތުން ހަމަހަމަކުރެވޭނީ، ކީރިތި ޤުރްއާން ބިނާވެފައިވާ ތަރުތީބުން، ކަނާތުން ވާތަށް، ބަލައިގެން ކިޔަވަން ދަސްކޮށް ފަރިތަކޮށް އާދަކޮށްގެންނެވެ. އަދި ބަލައިގެން ކިޔަވަން ދަސްކުރުމާއެކު، ނުބަލައި ކިޔަވަން ދަސްކުރާ މީހުން، ފެންވަރުގެ ގޮތުން ހަމަހަމަ ކުރެވޭނީ، ކީރިތި ޤުރްއާން ބިނާވެފައިވާ ތަރުތީބުން، ކަނާތުން ވާތަށް، ނުބަލައި ކިޔަވަން، ދަސްކޮށް ފަރިތަކޮށް އާދަކޮށްގެންނެވެ.
ކީރިތި ޤުރްއާން ބަލައިގެން ކިޔަވަން ދަސްކުރިޔަސް، އަދި ނުބަލައި ކިޔަވަން ދަސްކުރިޔަސް، ދަސްކުރަން ޖެހޭނީ، ދަސްކުރާ ފިލާވަޅުގެ ސަބަބުން، ޖެހިގެން އޮތް ފިލާވަޅު ދަސްކުރަން ފަސޭހަވާ ގޮތަށެވެ. އެކަން ޙާޞިލު ކުރެވޭނީ، ކީރިތި ޤުރްއާން ބިނާވެފައިވާ ތަރުތީބުން، ދަސްކުރާ ޤުރްއާން ފިލާވަޅު، ދަސްކޮށް ފަރިތަކޮށް އާދަކޮށްގެންނެވެ.
ދަސްކުރާ ޤުރްއާން ފިލާވަޅުގެ ސަބަބުން، ޖެހިގެން އޮތް ފިލާވަޅު ފަސޭހަނުވާ ކަމުގައިވާނަމަ، އެއީ ޞައްޙަ އަދި ފުރިހަމަ އުނގެނުމެއް ނޫނެވެ. ނުވަތަ ޤުރްއާން ފިލާވަޅުތައް ބަލައިގެން ނުވަތަ ނުބަލައި ކިޔަވަން ދަސްކުރާއިރުވެސް، ޖެހިގެން އަންނަ ފިލާވަޅުތައް ދަސްކޮށް ފަރިތަކޮށް އާދަކުރުމަށް، ގިނަ ވަޤުތު ނަގާނަމަ، އެއީ ޞައްޙަ އަދި ފުރިހަމަ އުނގެނުމެއް ނޫނެވެ. އެކަމުން އަންގައިދެނީ، ކުރިން ދަސްކުރި ފިލާވަޅުތައް، އެންމެ ފުރިހަމައަށް ދަސްކޮށް ފަރިތަކޮށް އާދަނުކުރެވޭ ކަމެވެ.
ކީރިތި ޤުރްއާނުގެ ޠަބީޢަތަކީ، ކީރިތި ޤުރްއާނުން ދަސްކުރާ ފިލާވަޅުތައް، ދަސްކޮށް ފަރިތަކޮށް އާދަކުރުމުގެ ސަބަބުން، ކުރިއަށް ހުރި ފިލާވަޅުތައް ދަސްކޮށް ފަރިތަކުރުމަށް، ހޭދަކުރަންޖެހޭ ވަޤުތު މަދުވުމެވެ.
ކީރިތި ޤުރްއާން ބަލައިގެން ކިޔަވަން ދަސްކުރާ މީހުންނާއި ނުބަލައި ކިޔަވަން ދަސްކުރާ މީހުން، އެއް ފެންވަރަކަށް ގެނައުމަށް، ޚާއްޞަކުރެވޭ މައިގަނޑު ތަމްރީނުތަކަކީ، توضيح | توضيح العقلى | حرف بعد حرف | كلمة بعد كلمة | آية بعد آية | سورة بعد سورة ، މި ތަމްރީނުތަކެވެ.
ލިޔުނީ:- ޝުޢައިބު ޢަލީ