ކީރިތި ޤުރްއާން ހިތު ދަސްކުރުމަށް، މަސައްކަތް ކުރާ މީހުންގެ ތެރެއިން، އެކަން ކާމިޔާބު ކުރެވެނީ ވަރަށް މަދު ބަޔަކަށެވެ. އެއީ ކީއްވެ؟ މިއީ ވަރަށް ގިނަ މީހުން ކުރާ ސުވާލެކެވެ.
ކީރިތި ޤުރްއާން ހިތު ދަސްކުރުމަށް، މަސައްކަތް ފަށާއިރު، އަޅުގަނޑުމެން ދެނެގަންނަން ޖެހޭ ކަމަކީ، އެކި އިންސާނުންގެ ކިބާގައި، ހިތު ދަސް ކުރުމުގެ ފެންވަރު، ވަރަށް ބޮޑަށް ތަފާތު ވާނެކަމެވެ. އެހެންވީމަ ހިތު ދަސްކުރާ މީހުން، އެއް ފެންވަރަކަށް ގެނައުމަށް، ޚާއްޞަ ގޮތްތަކަކާއި ތަރުތީބެއް ކޮންމެހެންވެސް ލާޒިމުވާނެއެވެ. އެހެން ނޫނީ، ކީރިތި ޤުރްއާން އުނގެނި ދަސްކުރާ މީހުންނަށް، ތަޖުވީދުގެ ހަމަތަކާ އެއްގޮތަށް، ބަލައިގެން ފަރިތަކަމާއެކު ރަނގަޅަށް ކިޔަވަން ނޭނގުމުގެ އިތުރުން، ހިތު ދަސްކުރުން ވެސް ކާމިޔާބު ނުކުރެވި، އެންމެ ފަހުން ފޫހިވެގެން، ކީރިތި ޤުރްއާނާ ދުރަށް ގޮސްދާނެއެވެ.
ކީރިތި ޤުރްއާން ހިތު ދަސްކުރުމަށް، މަސައްކަތް ކުރާ މީހުންގެ ތެރެއިން، ގިނަ ބަޔަކަށް، އެކަން ކާމިޔާބުކުރަން އުނދަގޫވަނީ، މައިގަނޑު ތިން ކަމެއްގެ ސަބަބުންނެވެ.
1- ހިތު ދަސްކުރަންޖެހޭ ގޮތާއި ތަރުތީބު އިޚްތިޔާރުނުކުރުން.
ކީރިތި ޤުރްއާން ހިތު ދަސްކުރަންޖެހޭ ގޮތާއި ތަރުތީބު އެވަނީ، ކީރިތި ޤުރްއާނުގައެވެ. އެއީ އަކުރުން އަކުރަށް ކަލިމައިން ކަލިމައަށް އަދި އާޔަތުން އާޔަތަށް، އަދި ސޫރަތުން ސޫރަތަށް، ކީރިތި ޤުރްއާން ބިނާކުރެވޭ ގޮތަށް، ހިތު ދަސްކުރާ ފިލާވަޅު ބަލައިގެން ކިޔެވުމެވެ. އެ ތަރުތީބުން ތަކުރާރުކޮށް ބަލައިގެން ކިޔެވުމެވެ. ބަލައިގެން ތަކުރާރުކޮށް ކިޔެވުމަކީ، ހިތު ދަސްކުރުމަށް، ފަސޭހަވެގެންދާނެ ސަބަބެކެވެ. އޭރުން ލޯ މަރާލުމުން، ކިޔަވާތަން ފެންނާނެއެވެ. ނުވަތަ ޞިފަކުރެވޭނެއެވެ. މިއީ އަޅުގަނޑުވެސް ތަޖުރިބާ ކޮށްފައިވާ ކަމެކެވެ.
ކީރިތި ޤުރްއާން ބިނާވެފައިވާ ތަރުތީބުން، ބަލައިގެން ކިޔަވަން ދަސްކޮށް ފަރިތަކޮށް އާދަނުކޮށް، ޤުރްއާން ފިލާވަޅު ހިތު ދަސްކުރަން މަސައްކަތް ކުރާނަމަ، އެކަން ކާމިޔާބުކުރެވޭނީ، ވަރަށް މަދު ބަޔަކަށެވެ. އަދި އެގޮތަށް ހިތު ދަސްކުރާ މީހުންނަށް، އަވަސް އަވަހަށް މުރާޖާކުރަން، ގިނަ ފަހަރު މަޖުބޫރުވާނެއެވެ.
2- ވަޤުތު ބަހާލަން ނޭނގުން.
ކީރިތި ޤުރްއާން ހިތު ދަސްވުމަކީ، ބަލައިގެން ކިޔަވަން ދަސްކޮށް ފަރިތަކޮށް އާދަކުރުމުގެ ނަތީޖާއެވެ. އެހެންވީމަ، ކީރިތި ޤުރްއާން ބަލައިގެން ކިޔަވަން ދަސްކުރާ ވަޤުތާއި، ހިތު ދަސްކުރާ ވަޤުތަކީ، ޙަޤީޤަތުގައި އެއް ވަޤުތެކެވެ.
ނަމަވެސް އަޅުގަނޑުމެންގެ ތެރެއިން ގިނަ މީހުން، ކީރިތި ޤުރްއާން ހިތު ދަސްކުރުމަށް މަސައްކަތް ކުރަނީ، އެގޮތަކަށް ނޫނެވެ. ކީރިތި ޤުރްއާން އުނގެނި ދަސްކުރާ މަރުޙަލާގައި، ޤުރްއާނަށް ޚާއްޞަކޮށްގެން ވަޤުތު ބަހާލުމުގައި، ހަރުދަނާކަމެއް ނެތްނަމަ، ކީރިތި ޤުރްއާން ބަލައިގެން ކިޔަވަން ދަސްކުރުމާއި ނުބަލައި ކިޔަވަން ދަސްކުރުން ވެސް ކާމިޔާބު ނުކުރެވޭނެއެވެ.
ކީރިތި ޤުރްއާން އުނގެނި ދަސްކުރާ މަރުޙަލާގައި، ބަލައިގެން ކިޔަވަން ނޭނގޭ ކުދިންނަށް، ޚަތިމުކުރަން ވަކި ވަޤުތެއް، ބަލައިގެން ކިޔަވަން ދަސްކުރަން ވަކި ވަޤުތެއް، ނުބަލައި ކިޔަވަން ދަސްކުރަން ވަކި ވަޤުތެއް ކަނޑައަޅާނަމަ، އެކަންކަމަށް ވަރަށް ގިނަ ވަޤުތު ބޭނުންވާނެއެވެ. އެކަމުގެ ސަބަބުން، އެއިން އެއްވެސް ބައެއް އެންމެ ފުރިހަމައަށް ޙާޞިލް ނުކުރެވޭނެއެވެ. އަދި އެކަމުގެ ސަބަބުން، ފިލާވަޅުތަކާމެދު، ވިސްނައި ފިކުރުކޮށްގެން، ދަސްކޮށް ފަރިތަކޮށް އާދަކުރުމަށް، ފުރުޞަތު ނުލިބޭނެއެވެ.
ކީރިތި ޤުރްއާން ބަލައިގެން ކިޔަވަން ދަސްކުރުމަކީ، ހިތު ދަސްކުރުމުގެ ބިންގަލެވެ. އެކަން ފުރިހަމަނުކޮށް ކީރިތި ޤުރްއާން ހިތު ދަސްކުރި ކަމުގައިވިޔަސް، އެއީ ޞައްޙަ ދަސްކުރުމެއް ނޫނެވެ. ސަބަބަކީ އެގޮތަށް ހިތު ދަސްކުރުމުން، ކީރިތި ޤުރްއާނުގެ ރަސްމު ފަހުމު ނުވާނެތީއެވެ. ކީރިތި ޤުރްއާނުގެ ލިޔުމުގައިވާ ގޮތް ނޭނގޭނެތީއެވެ. އަދި ކަލިމަތަކާއި އާޔަތް ރަސްމުކުރެވިފައިވާ ގޮތް ނަގައިގަންނަން ނޭނގޭނެތީއެވެ. އެކަމުގެ ސަބަބުން، ކަލިމަތަކުގެ މެދަށް، ވަޤްފު ކުރުމަށް މަގުފަހިވާނެތީއެވެ.
3- މުރާޖާކުރަންވީ ވަޤުތު ނޭނގުން.
ކީރިތި ޤުރްއާން މުރާޖާ ކުރުމަކީ، ދަސްކޮށް ފަރިތަކޮށް އާދަކޮށްފައިވާ މިންވަރު، އަލުން ތަކުރާރުކޮށް ކިޔުމެވެ. ރަނގަޅަށް ދަސްކޮށް ފަރިތަކޮށް އާދަނުކޮށް، ކިތަންމެ ވަރަކަށް މުރާޖާކުރިޔަސް، ހަނދާނުގައި ހަރެއް ނުލާނެއެވެ. އެކަމުގެ ސަބަބުން، އަވަސް އަވަހަށް މުރާޖާ ކުރަން މަޖުބޫރުވާނެއެވެ. އަދި އެކަމުގެ ސަބަބުން، މުރާޖާ ކުރަން ވަޤުތު ނުލިބޭތީ، ހިތު ދަސްކުރާ މިންވަރު ހަނދާން ނެތި، އެންމެ ފަހުން އެކަން ހުއްޓާލަން ޖެހެއެވެ.
އެހެން ވީމަ، ކީރިތި ޤުރްއާން މުރާޖާ ކުރަންޖެހޭ ވަޤުތަކީ، ކޮންމެ ފިލާވަޅެއް ވެސް ދަސްކޮށް ފަރިތަކޮށް އާދަވާ މިންވަރަށް، ތަކުރާރުކޮށް ކިޔައި ނިމޭ ވަޤުތެވެ. އެހާ ހިސާބުން، އެ ފިލާވަޅެއް ދާނީ، މުރާޖާ ކުރަންޖެހޭ ބައިގެ ތެރެއަށެވެ. ޤުރްއާން ފިލާވަޅު ދަސްކޮށް ފަރިތަކޮށް އާދަކުރެވުނު ކަމަށް ބެލެވޭނީ، ބަލައިގެން ކިޔަވަން އެނގުމެވެ. ބަލައިގެން ކިޔަވަން ނޭނގޭނަމަ، ކީރިތި ޤުރްއާން ދަސްކޮށް ފަރިތަކޮށް އާދަކުރެވުނު ކަމަކަށް ނުބެލެވޭނެއެވެ.
އަޅުގަނޑުމެންގެ ތެރެއިން ބައެއް މީހުން ޢަމަލުކުރާ ގޮތަކީ، ކީރިތި ޤުރްއާން ހިތު ދަސްކުރަން ފަށާ ހިސާބުން، ބަލައިގެން ކިޔަވަން ދަސްކުރުން ދޫކޮށްލަނީއެވެ. އެއީ އެއްގޮތަކަށް ވެސް، ރަނގަޅު ގޮތެއް ނޫނެވެ. ހިތު ދަސްކުރުން ކާމިޔާބު ނުކުރެވުނަސް، ކޮންމެ މުސްލިމަކަށް ވެސް، ކީރިތި ޤުރްއާން ބަލައިގެން ކިޔަވަން އެނގެން ޖެހޭނެއެވެ. އޭރުން ތަކުރާރުކޮށް ބަލައިގެން ކިޔެވުމުގެ ސަބަބުން، ލަހުން ވިޔަސް، ފަހުން ވިޔަސް، ކީރިތި ޤުރްއާން ހިތު ދަސްވުމަށް މަގުފަހިވެގެން ދާނެއެވެ.
ދަސްކުރާ ފިލާވަޅުތައް އަވަސް އަވަހަށް މުރާޖާ ކުރަންޖެހޭ އެންމެ ބޮޑު ސަބަބަކީ، ދަސްކުރުމުގައި ފަރުވާ ކުޑަވުމެވެ. ދަސްކުރާ ފިލާވަޅު ދަސްކޮށް ފަރިތަކޮށް އާދަނުވަނީސް، ޖެހިގެން އޮތް ފިލާވަޅަށް ދިއުމެވެ. އެކަން މިގޮތަށް ކުރާ މީހާއަކީ، ކީރިތި ޤުރްއާން ހިތު ދަސްވުމަށް، މެދުވެރިވާ ސަބަބުތައް ދޫކޮށް، އަމިއްލަ ގޮތްތަކެއް އިޚްތިޔާރުކުރާ މީހެކެވެ. އެފަދަ މީހަކަށް، ކީރިތި ޤުރްއާން ހިތު ދަސް ނުވުމަކީ، ކިޔަވައިދޭ މުދައްރިސުންގެ މައްސަލައެއް ނޫނެވެ. އަދި ކީރިތި ޤުރްއާނުގެ ވެސް މައްސަލައެއް ނޫނެވެ. އެއީ އެފަދަ މީހުންގެ ފަރުވާ ކުޑަކަމުން، ކުރިމަތިވާ މައްސަލައެކެވެ.
ލިޔުނީ:- ޝުޢައިބު ޢަލީ