ކީރިތި ޤުރްއާނަށް ފަރިތަވުން މާނަކުރަންޖެހޭ ގޮތް
ކީރިތި ޤުރްއާނަށް ފަރިތަވުން މާނަކުރުމުގައި، މީސްތަކުން ބެހެނީ 2 ބަޔަކަށެވެ.
1- ޢަރަބީން.
2- ޢަރަބި ނޫން މީހުން.
ޢަރަބީންގެ ތެރޭގައި ޢާންމުކޮށް، ކީރިތި ޤުރްއާނަށް ފަރިތަވުން ކަމުގައި ބަލަނީ، ހަމައެކަނި، ކީރިތި ޤުރްއާން ކިޔާލަން އެނގުމުންނެވެ. ސަބަބަކީ، ޢަރަބި ބަހުން ވާހަކަ ދައްކާތީއެވެ. ޢަރަބި ބަހުން ވާހަކަ ދެއްކުމުގެ ސަބަބުން، ކީރިތި ޤުރްއާނުގެ ދެލިގަނޑު ދަސްކުރުމަށް، މާބޮޑު މަސައްކަތްތަކެއް ކުރަން ނުޖެހޭނެތީއެވެ. އެކަމުގެ ސަބަބުން، ޢަރަބީންނަށް، ވަރަށް ފަސޭހައިން، ކީރިތި ޤުރްއާން ކިޔަން ދަސްވެ، ވަރަށް ފަސޭހައިން ޤުރްއާން ކިޔަވަން ދަސްވާނެއެވެ. ވީމާ ޢަރަބީންގެ ތެރޭގައި، ކީރިތި ޤުރްއާނުގެ ދެލިގަނޑު ފަރިތަކުރުން، ވަކި އުނގެނުމެއްގެ ގޮތުގައި، ޢާންމުކޮށް ޚާއްޞަ ނުކުރަނީއެވެ.
ނަމަވެސް ޢަރަބި ނޫން މީހުން، ކީރިތި ޤުރްއާނަށް ފަރިތަވުން، މާނަކުރަން ޖެހޭ ގޮތް މުޅިން ތަފާތެވެ. ސަބަބަކީ ޢަރަބި ބަސް ނޫން އެހެން ބަހަކުން ވާހަކަ ދައްކާތީއެވެ. ޢަރަބި ނޫން މީހުން، ކީރިތި ޤުރްއާނަށް ފަރިތަވުމަކީ، ކީރިތި ޤުރްއާނުގެ ދެލިގަނޑަށް ( ލިޔުމަށް ) ފަރިތަވުމާއެކު، ތަޖުވީދުގެ ޤަޥާޢިދުތަކާ އެއްގޮތަށް، ކީރިތި ޤުރްއާން ކިޔަވަން ފަރިތަވުމެވެ. ކީރިތި ޤުރްއާނަށް ފަރިތަވުން މާނަކުރުމުގައި، ޢަރަބީންގެ ތެރޭގައި ޢާންމުކޮށް މާނަކުރާ ގޮތަށް، ޢަރަބިނޫން މީހުން މާނަކުރަން ފަށައިފިނަމަ، ތަޖުވީދުގެ ޤަޥާޢިދުތަކާ އެއްގޮތަށް، ކިޔަވަން ދަސްކުރުމެއް ނެތި، ވާހަކަ ދައްކާގޮތަށް، ހަމައެކަނި ކިޔުމުން، ކީރިތި ޤުރްއާން ފަރިތަކުރުމަށް، އިސްކަންދޭ ބަޔަކު ޢަރަބި ނޫން މީހުންގެ ތެރޭގައި، އުފެދިދާނެއެވެ. އެކަމުގެ ސަބަބުން، ކީރިތި ޤުރްއާނުގެ ދެލިގަނޑު ފަރިތަކުރުމަށް، ނުވަތަ ބަލައިގެން ކިޔެވުމަށް، މީސްތަކުން ފަރުވާ ކުޑަކުރާނެއެވެ. އަދި އެކަމުގެ ސަބަބުން، ކީރިތި ޤުރްއާން ކިޔެވުމުގައި އެކުލެވެން ޖެހޭ، ފަރުވާތެރިވުމުގެ ޞިފަ ނެތިގެންދާނެއެވެ.
ދިވެހި ރާއްޖޭގެ ޙާލަތަށް ބަލާއިރު، ގިނަ ބެލެނިވެރިން މަސައްކަތް ކުރަނީ، ދަރިވަރަށް ވާނުވާ ނޭނގުނަސް، ނަމަކަށް ތަޖުވީދު ކިޔަވައިދީގެން، އަވަހަށް ޤުރްއާން ކިޔާލަން ދަސްކޮށްދިނުމަށެވެ. ޤުރްއާން ކިޔަވަން ދަސްކޮށްދިނުމަށް، އިސްކަމެއް ނުދެވެއެވެ. ވާހަކަ ދައްކަން އެނގޭ ކޮންމެ މީހަކަށް ވެސް، ހަމައެކަނި ކީރިތި ޤުރްއާން ކިޔަން ދަސްކުރެވިދާނެއެވެ. ކިޔާލަން އެނގިދާނެއެވެ. ނަމަވެސް، ކީރިތި ޤުރްއާން ކިޔަވާކަށް ނޭނގޭނެއެވެ. އެހެންވީމަ، ތަޖުވީދުގެ ޤަޥާޢިދުތަކަށް ޢަމަލުކުރުމެއް ނެތި، ވާހަކަ ދެއްކުމާ އެއްގޮތްވާ ގޮތަށް، ކީރިތި ޤުރްއާން ކިތަންމެ ފަރިތަކޮށް ކިޔަން އެނގުނަސް، އެކަމުގައި އެއްވެސް ޚާއްޞަކަމެއް ނުވެއެވެ. ޚާއްޞަކަން ވަނީ، ކީރިތި ޤުރްއާން ކިޔަވަން އެނގުމުގައެވެ. ކިޔަން އެނގުމުގައެއް ނޫނެވެ. ކީރިތި ޤުރްއާން ކިޔަވަން އެނގުމަކީ، ތަޖުވީދުގެ ޤަޥާޢިދުތަކާ އެއްގޮތަށް، ބަލައިގެން ފަރިތަކަމާއެކު ޤުރްއާން ކިޔަވަން އެނގުމެވެ.
ކީރިތި ޤުރްއާނަށް ފަރިތަވުމަކީ، ތަޖުވީދުގެ ޤަޥާޢިދުތަކާ އެއްގޮތަށް، ކިޔަވަން ދަސްކުރުމެއް ނެތި، ވާހަކަ ދައްކާގޮތަށް، ހަމައެކަނި ޤުރްއާން ކިޔާލުން ކަމަށް، މާނަކުރާ މީހުން ދިވެހިންގެ ތެރޭގައި، މަދެއް ނޫނެވެ. ނުވަތަ ނުބަލައި ކިޔަން އެނގުން ކަމުގައި، މާނަކުރާ މީހުން މަދެއް ނޫނެވެ. އެކަމުގެ ސަބަބުން، ކީރިތި ޤުރްއާނުގެ ދާއިރާ، އިތުރަށް ބަލިކަށި ވާނެއެވެ. އަދި އެކަމުގެ ސަބަބުން، ކީރިތި ޤުރްއާން ބަލައިގެން ކިޔަވަން ނޭނގި، ނުބަލައި ކިޔަން އިސްކަން ދިނުން ޢާންމު ވެދާނެއެވެ. މިހާރު ވެސް މިއީ ވަރަށް ޢާންމު ކަމެކެވެ.
ޢަރަބި އަކުރުތަކާއި ޢަރަބި ވަޒަންތައް ނޭނގޭ، ކުޑަކުޑަ ކުދިންނަށް، އެކުދިންގެ ދޫ ފަރިތަކުރުމަށް، އަޑު ދަށުން ސޫރަތްތައް ކިޔައި ދިނުމަކީ، ހިތު ދަސްކުރުންކަމުގައި މާނަކޮށް، އެގޮތަށް ކިޔައިދިނުމުން، ނުބަލައި ސޫރަތްތައް ކިޔަން އެނގޭތީ، ބައެއް ބެލެނިވެރިން ޤަބޫލުކުރަނީ، އެއީ ދަރިވަރަށް، ކީރިތި ޤުރްއާން ކިޔަވަން ދަސްވީ ކަމަށެވެ. ނުވަތަ ޤުރްއާނަށް ފަރިތަވީ ކަމަށެވެ. ނަމަވެސް އެއީ، ކީރިތި ޤުރްއާނަށް ފަރިތަވުމެއް ނޫނެވެ. ނުވަތަ ދަސްވުމެއް ނޫނެވެ. ނުވަތަ ކިޔަވަން އެނގުމެއް ނޫނެވެ.
ނުބަލައި ސޫރަތްތައް ކިޔަން އެނގުމަކީ، ކީރިތި ޤުރްއާނަށް ފަރިތަވުން ކަމުގައި ޤަބޫލުކުރާ ބެލެނިވެރިން، ދަރިވަރަށް ކީރިތި ޤުރްއާނުގެ ދެލިގަނޑު ފަރިތަކޮށްދިނުމަށް، އެއްވެސް އިސްކަމެއް ނުދެއެވެ. އަދި ދަރިވަރަށް ބާރު އަޅަނީ ވެސް، ނުބަލައި ސޫރަތްތައް ކިޔަން ދަސްކުރުމަށެވެ. މިއީ ކީރިތި ޤުރްއާން ކިޔަވަން ދަސްކުރުމުގައި، ދަރިވަރުގެ ޒިންމާއަށް، ދަރިވަރު ކަންނެތް ކުރުވާނެ ސަބަބެކެވެ. އަދި އެއީ، ޤުރްއާން އުނގެނި ދަސްކުރުމުގައި މަކަރު ހެދުމަށް، ހުޅުވާލެވޭ ދޮރެކެވެ. އަދި އެކަމުގެ ސަބަބުން، ކީރިތި ޤުރްއާން އުނގަންނައި ދިނުމަށް، މުދައްރިސުން ކުރާ ބުރަ މަސައްކަތްތަކުން، އެދެވޭ ނަތީޖާއެއް ނެރެން އުނދަގޫވެއެވެ. މިއީ ބެލެނިވެރިން ފުންކޮށް، ވިސްނާލަން ޖެހޭ ކެމެކެވެ. ބެލެނިވެރިން ވެސް، ކީރިތި ޤުރްއާން އުނގެނި ދަސްކުރަން ޖެހެއެވެ.