އުނގެނި ދަސްކުރުމުގައްޔާއި ކިޔެވުމުގައި، ކީރިތި ޤުރްއާން ދަރަޖަކުރެވިފައިވާ ގޮތް ދެނެގަތުން
ވަރަށް ގިނަ މީހުން ސުވާލުކުރެއެވެ.
ކީރިތި ޤުރްއާން ކިޔަވަން ދަސްކުރުމުގައި އުނގެނުން، ދަރަޖަކުރަންވީ، ހަމައެކަނި ކިޔެވުމެއް ކިޔަން ދަސްކުރާ ގޮތަށް ހެއްޔެވެ؟ ނޫނީ ޚާއްޞަ ފަންނެއް ( ހުނަރެއް ) ދަސްކުރާ ގޮތަށް ހެއްޔެވެ؟
މި ސުވާލުގެ ޖަވާބު ވިސްނައިގަތުމުގައި، އެންމެ ފުރަތަމަ ކަމަކީ، ކިޔެވުމަކީ ކޮބައި ކަމާއި ޚާއްޞަ ފަންނަކީ ކޮބައިކަން ދެނެގަތުމެވެ.
ކިޔަވަން ދަސްކުރުން
ކިޔުމަކީ ނުވަތަ ކިޔެވުމަކީ، ޢާންމު ކަމެކެވެ. ވާހަކަ ދައްކަން އެނގޭ ކޮންމެ މީހަކަށް، ކިޔަވަން ނުވަތަ ކިޔަން ދަސްކުރުމަކީ ފަސޭހަ ކަމެކެވެ. އެކަމުގައި މާބޮޑު ތަރުތީބެއް ބޭނުމެއް ނުވާނެއެވެ. ސަބަބަކީ އެއްޗެއް ކިޔަވާލަން ނުވަތަ ކިޔަން ދަސްކުރުމަކީ، ނުވަތަ އެނގުމަކީ، އާދައިގެ ޢާންމު ކަމަކަށް ވާތީއެވެ. އެކަމުގައި އެއްވެސް ޚާއްޞަކަމެއް ނެތެވެ.
ހަމައެކަނި ޤުރްއާން މުބާރާތަށް ތައްޔާރުވުމާއި، ޚަތިމްކުރުމުގެ ވިސްނުމުގައި ޤުރްއާން ކިޔަވަން ދަސްކުރުމަކީ، ކީރިތި ޤުރްއާން އުނގެނި ދަސްކުރަންޖެހޭ ކައިފިއްޔަތާ، އުނގެނޭ މީހާ ދުރުކޮށް، ޤުރްއާން ކިޔެވުމުގެ ޚާއްޞަކަން ކަނޑުވާލާ ސަބަބެކެވެ. މިއަދު ދަރިވަރުންގެ ފަރާތުން މި ފެންނަނީ، އެފަދަ ޞިފަތަކެވެ. ހަމައެކަނި ޤުރްއާން ކިޔަވަން ދަސްކުރަން މަސައްކަތްކުރުމަކީ، ވަރަށް ގިނަ ދަރިވަރުންނަށް، ކީރިތި ޤުރްއާން އުނގެނި ދަސްކުރުމަށް، އުނދަގޫވާ އެންމެ ބޮޑު ސަބަބެވެ.
ޚާއްޞަ ފަންނެއް ( ހުނަރެއް ) ދަސްކުރުން
ވަކި ޚާއްޞަ ފަންނެއް ( ހުނަރެއް ) ދަސްކުރުމަކީ، އެކަމެއްގައި ޚާއްޞަ ޤަވާޢިދެއް ލާޒިމުވެފައިވާ، ޚާއްޞަ ކަންތަތަކަކާ ނުވަތަ ޚާއްޞަ ތަރުތީބާ ޚިލާފު ނުވެވޭ ގޮތަށް، ވަކި ތަރުތީބަކުން ދާއިމީކޮށް ޘާބިތުވެވޭ ގޮތަށް، ދަސްކުރާ ދަސްކުރުމެވެ. މިފަދަ އުނގެނުންތަކާއި ކިޔަވާ ކިޔެވުންތައް ޚާއްޞަ ވާނެއެވެ. ކީރިތި ޤުރްއާނަކީ އެފަދަ ކިޔެވުމެކެވެ.
ކީރިތި ޤުރްއާން ކިޔަވަން ދަސްކުރުމުގައި، ޚާއްޞަ ފަންނެއް ( ހުނަރެއް ) ދަސްކުރާ ގޮތަށް، އުނގެނެން ޖެހޭ މައިގަނޑު ސަބަބުތައް:-
1- ކީރިތި ޤުރްއާނަކީ ކިޔެވޭ ކިޔެވުމެއް ކަމުގައިވާތީއެވެ.
2- ވާހަކަ ދައްކާ ގޮތަށް ކީރިތި ޤުރްއާން ކިޔެވުން ހުއްދަ ނުވާނެތީއެވެ.
3- އުނގެނުމުގައި ކިޔޭ ގޮތާއި ލިޔެވިފައިވާ ގޮތް ދަސްކުރަން ޖެހޭތީއެވެ.
4- ކީރިތި ޤުރްއާން ކިޔެވުން، އިންސާނާގެ ދުލާއި އަޑާ ގުޅިފައިވާތީއެވެ.
5- ބޭނުން ކޮންމެ ރާގަކަށް، ނުވަތަ ފަސޭހަ ކޮންމެ ރާގަކަށް، ކީރިތި ޤުރްއާން ކިޔެވުން ހުއްދަ ނުވާތީއެވެ.
6- ކީރިތި ޤުރްއާނާ މުނާސަބު ރާގުތައް ދަސްކުރުމުގައި، ވަކި ޚާއްޞަ ތަރުތީބެއް އޮންނާތީއެވެ.
7- ތަޖުވީދުގެ ޤަވާއިދުތަކަށް ޢަމަލުކުރުމުގައި، ކިޔަވާ މީހާގެ ކިޔުމުގެ ހުނަރާއި ވިސްނުމުގެ ހުނަރު ލާޒިމުވާތީއެވެ.
8- ދާއިމީކޮށް ޘާބިތުވެވޭ މިންވަރަށް، ކީރިތި ޤުރްއާން ކިޔަވަން ދަސްކުރަން ޖެހޭތީއެވެ.
9- ކިޔުމުގައި ދިމާވާ ތަފާތު އުނދަގޫތަކުން، ސަލާމަތްވާނެ ގޮތް ދަސްކުރަން ޖެހޭތީއެވެ.
10- ކިޔެވުމުގައި އަޑުގެ ދަރަޖަތަކަކުން ރާގު އުފެދޭތީއެވެ.
11- ކީރިތި ޤުރްއާން ކިޔެވުމުގައި ޢަރަބި ބަސް ޚާއްޞަކުރަންޖެހޭތީއެވެ.
މިހުރިހާ ސަބަބުތަކަށް ވިސްނާލުމުން އެނގިގެންދަނީ، ކީރިތި ޤުރްއާން ކިޔަވަން ދަސްކުރުމުގައި، ހަމައެކަނި ކިޔާލަން ނުވަތަ ކިޔަވާލަން ދަސްކުރުމުގެ ވިސްނުމަށް ވުރެ، ޚާއްޞަ ފަންނެއް ނުވަތަ ހުނަރެއް ދަސްކުރުމުގެ ވިސްނުން އިސްކުރަން ޖެހޭނެކަމެވެ.
ކީރިތި ޤުރްއާން އުނގެނި ދަސްކުރާ މަރުޙަލާގައި، ހަމައެކަނި ކިޔަވަން ނުވަތަ ކިޔާލަން ދަސްކުރުން ޚާއްޞަ ކުރުމަކީ، ޢިލްމީ ގޮތުންނާއި ޢަމަލީގޮތުން ބެލިޔަސް، އެއްވެސް ތާކުންތާކު ޖެހޭ ގޮތެއް ނޫނެވެ. އެއީ ކީރިތި ޤުރްއާނުގެ ޚާއްޞަކަން ގެއްލުވައިލުމެވެ.
ލިޔުނީ:- ޝުޢައިބު ޢަލީ