ކީރިތި ޤުރްއާން އުނގެނުމަށް ޚާއްޞަވުމާއި އުނގެނެންވީ ގޮތް
ކީރިތި ޤުރްއާން އުނގެނުމަށް ޚާއްޞަވުމާއި، އުނގެނެންވީ ގޮތް ދެނެގަތުމުގައި، އުނގެނޭމީހާ އާއި މުދައްރިސުން އަދި ބެލެނިވެރިންނާއި ސަރުކާރުގެ ކަމާ ގުޅުންހުރި ފަރާތްތަކުގެ ވިސްނުން ވެސް، ބަދަލުކުރަން ޖެހެއެވެ.
އިންސާނާގެ ސިކުނޑީގައި، މަޢުލޫމާތު ހަރުލުމުގައި، މައިގަނޑު 3 ދަރަޖައެއް ވެއެވެ.
1- އިވޭ އިވުމާއި، ފެންނަ ފެނުން އަދި ކިޔޭކިޔުން ފަދަ، އިޚްތިޔާރަކާއި ނުލައި، ލިބޭ މަޢުލޫމާތުތައް ސިކުނޑީގައި ހަރުލުން.
– މިއީ އެންމެ ބަލިކަށި ގޮތެވެ. ކީރިތި ޤުރްއާން އުނގެނުމުގައި، އެއްވެސް ތަރުތީބެއް ނެތި އަދި އުނގެނުމަށް ޚާއްޞަ ތަމްރީނެއް ނެތި، މުދައްރިސާއި އެއްކޮށް ކިޔެވުމުގެ ސަބަބުން، ދަރިވަރުންނަށް ޙާޞިލްވަނީ، މި މިންވަރެވެ. މާނައަކީ އެންމެ ބަލިކަށި މިންވަރެވެ.
– އަވަހަށް ޚަތިމުކޮށްފައިވާ ދަރިވަރުންނާއި، އަދި ހަމައެކަނި މުބާރާތްތަކަށް ފަރިތަކުރާ ކުދިންގެ ފެންވަރު ރަނގަޅަށް ވަޒަންކޮށްލުމުން، މިކަން ވަރަށް ރަނގަޅަށް ސާބިތުވާނެއެވެ. ސުވާލުތަކަށް ޖަވާބުދޭން އެނގުމަކީ ވެސް، އަދި އެނގުމެއް ނޫނެވެ. ޚާއްޞަކޮށް ސުވާލުތައް ލިޔެ އެސުވާލުތަކުގެ ޖަވާބު ހިތު ދަސްކުރުމަކީ، ކީރިތި ޤުރްއާން އުނގެނުމުގައި، އެކަށީގެންވާ ގޮތެއް ނޫނެވެ. ސަބަބުތައް ވަރަށް ގިނައެވެ.
2- އަހާއެހުމާއި ބަލާބެލުން އަދި ކިޔާކިޔުން ފަދަ، އިޚްތިޔާރުން ހޯދައިގަންނަ މަޢުލޫމާތުތައް، ސިކުނޑީގައި ހަރުލުން. ( ޝޯޓް ޓާރމް މެމޮރީ )
މިއީ ކީރިތި ޤުރްއާން އުނގެނުމުގައި، އިޚްތިޔާރީ ނިޔަތުގެ ސަބަބުން އުފެދޭ، ސިކުނޑީގައި މަޢުލޫމާތު ހަރުލާ ދަރަޖައެކެވެ. މި އިޚްތިޔާރަކީ، ހަމައެކަނި ޤުރްއާން ކިޔަވަން ދަސްކުރަން އިސްކަންދީގެން، ނުވަތަ މުބާރާތަށް ފަރިތަކުރުމުގެ ޝައުޤުވެރިކަން އުފައްދައިގެން، ނުވަތަ އަވަހަށް ޚަތިމުކުރުމުގެ ޝައުޤުވެރިކަން އުފައްދައިގެން، އަންނާނެ އިޚްތިޔާރެއް ނޫނެވެ.
އެފަދަ ކަންކަމުގެ ސަބަބުން ޢާންމުކޮށް، ދަރިވަރުންގެ ކިބާގައި އުފެދޭ އިޚްތިޔާރަކީ، ވާދަވެރިކަމުގެ އިޚްތިޔާރެކެވެ. އުނގެނުމުގެ އިޚްތިޔާރެއް ނޫނެވެ. އަދި އެފަދަ ކަންކަމުގެ ސަބަބުން، ކިޔަވާ ކިޔެވުން ހަރުލަނީ ދުލުގައެވެ. ސިކުނޑިއާ އެއްވެސް ގުޅުމެއް ނުއުފެދެއެވެ.
ކީރިތި ޤުރްއާން އުނގެނުމުގައި، އުނގެނޭ މަޢުލޫމާތުތައް ނުވަތަ ލިބޭ މަޢުލޫމާތުތައް، ސިކުނޑީގައި ހަރުލެއްވުމަށްޓަކައި މެދުވެރިކުރަންޖެހޭނީ، ކިޔުމުގެ ތަމްރީނުތަކެކެވެ.
އެގޮތުން ތިރީގައިވާ ތަމްރީނުތަކުގެ ބޭނުމަކީ، ދަރިވަރު އުނގެނޭ އުނގެނުމާއި، ކިޔާކިޔުން ސިކުނޑިއާ ގުޅުވުމެވެ. ނަތީޖާއެއްގެ ގޮތުން އެފަދަ އުނގެނުން، ދިގު މުއްދަތަކަށް ހަނދާނުގައި ހަރުލާ މިންވަރަށް ދަސްވެގެން ދާނެއެވެ. އެ ތަމްރީނުތަކަކީ:- توضيح | حرف بعد حرف | كلمة بعد كلمة | آية بعد آية | معلّم | كيفية البيان | مقابلة | إقتداء ފަދަ ތަމްރީނުތަކެވެ.
– ކީރިތި ޤުރްއާން އުނގަންނައި ދިނުމުގައި، މާގިނައިން ކުށް ކިޔުމާއި، މާގިނައިން ކުށް ފާހަގަކުރަން ޖެހެނީ، މިގޮތަށް އުނގަންނައި ނުދެވޭތީއެވެ. ނުވަތަ އުނގަންނައިދޭ މީހާއަށް، ކުށް ފާހަގަކުރުމާއި ކުށް އިޞްލާޙުކޮށްދިނުމުގެ ތަރުތީބު ނޭނގޭތީއެވެ.
3- އަހާއެހުމާއި ބަލާބެލުން އަދި ކިޔާކިޔުން ފަދަ، އިޚްތިޔާރުން ހޯދައިގަންނަ މަޢުލޫމާތުތައް، އިތުރު ސަބަބެއް މެދުވެރިކޮށްގެން ސިކުނޑީގައި އިތުރަށް ހަރުލެއްވުން. ( ލޯންގް ޓާރމް މެމޮރީ )
– އަހާއެހުމާއި ބަލާބެލުން އަދި ކިޔާކިޔުން ފަދަ، އިޚްތިޔާރުން ހޯދައިގަންނަ މަޢުލޫމާތުތައް، ސިކުނޑީގައި ހަރުލެއްވުމަށް، ތަމްރީނުތަކެއް ބޭނުންކުރާނަމަ މިބައި ޙާޞިލްވެގެންދާނެއެވެ.
– ކީރިތި ޤުރްއާން އުނގެނުމުގައި ތަމްރީނުތަކެއް ބޭނުން ކުރަންޖެހެނީ، މި ސަބަބުތަކާ ހެދިއެވެ. ސަބަބަކީ ކީރިތި ޤުރްއާން އުނގެނުމުގައި، ވަޤުތީ އުނގެނުން އެކަށީގެން ނުވާތީއެވެ. ހިތާމައަކީ ސްކޫލުގެ އެހެން މާއްދާތައް ކިޔަވައިދިނުމުގައި، މުދައްރިސުން މިފަދަ ކަންކަމަށް ރިޢާޔަތްކުރާއިރު، ކީރިތި ޤުރްއާން އުނގަންނައި ދިނުމުގައި، މިފަދަ ކަންކަމަށް ރިޢާޔަތް ނުކުރާތީއެވެ. ޤުރްއާން ވީމަ ޢާންމުކޮށް މި އޮންނަނީ ޚަތިމުކުރުމާއި، މުދައްރިސާ އެއްކޮށް ކިޔެވުމެވެ. ނުވަތަ މުބާރާތަށް ތައްޔާރުވުމެވެ. މިއީ ކީރިތި ޤުރްއާން އުނގަންނައި ދިނުމުގައި، އެއްގޮތަކަވެސް ރަނގަޅު ގޮތެއް ނޫނެވެ.
ކީރިތި ޤުރްއާން އުނގަންނައި ދިނުމުގައި، ކުރިއަށް އޮތް ތަނުގައި ކުރިއަށް ދެވެން އޮތީ، މުދައްރިސުންނާއި ދަރިވަރުން އަދި ބެލެނިވެރިންނާއި ސަރުކާރުން ވެސް، މިހާރު މި ޢަމަލުކުރާ ގޮތް ބަދަލުކުރަން މަސައްކަތްކޮށްގެންނެވެ. މިހާރުގެ ޙާލަތަށް ބަލާއިރު، ކީރިތި ޤުރްއާނާ ޖެހުނީމަ، ދަރިވަރުން އަންނަނީ ގޭގައި ހިތާއި ސިކުނޑި ބާއްވާފައެވެ. މިއީ ވަރަށް ހިތާމަހުރި ކަންކަމެވެ. ޤުރްއާން އުނގެނުމުގައި އެއްވެސް މިންވަރަކަށް ވިސްނުމެއް ފިކުރުކުރުމެއް، ތަރުތީބެއް ޚާއްޞައެއް ނުކުރެއެވެ. މިކަމުގެ އެންމެ ބޮޑު ޒިންމާއެއް ނަގަންޖެހެނީ ބެލެނިވެރިންނެވެ.
ލިޔުނީ:- ޝުޢައިބު ޢަލީ