ބެލެނިވެރިން ހަމައެކަނި، ޤުރްއާން މުދައްރިސުންނާއި ޤުރްއާން ކުލާސްތައް ގޯސްކުރުމުން، ދަރިން މޮޅެތި ބޮޑެތި ޤާރީވެރިންނަށް ބަދަލު ވާނެ ހެއްޔެވެ؟
ކީރިތި ޤުރްއާން ކިޔަވަން ދަސްކުރުމުގައި، ދިމާވާ އެކިއެކި މައްސަލަތައް، ޙައްލުކުރަން ބޭނުންވާނަމަ، އިޚްލާޞްތެރިކަމާއެކު ބެލެނިވެރިންވެސް ދެނެގަންނަންވީ، އެފަދަ މައްސަލަތައް އުފެދޭ ސަބަބެވެ. އަދި އެފަދަ މައްސަލަތައް ޙައްލުކުރުމަށް، ފަންނީ މީހުންނާއި ޤުރްއާން މުދައްރިސުން، ފޯރުކޮށްދޭ އިރުޝާދުތަކާ އެއްގޮތަށް، ބެލެނިވެރިންނާއި ދަރިވަރުންވެސް ޢަމަލުކުރަންވީއެވެ. އެކަންކަން ނުކޮށް، ޤުރްއާން މުދައްރިސުންނަށާއި ޤުރްއާން ކުލާސްތަކަށް ބެވުމަކުން، މައްސަލަ ޙައްލެއް ނުކުރެވޭނެއެވެ.
ކީރިތި ޤުރްއާން ކިޔަވަން ދަސްކުރާ ގިނަ ދަރިވަރުންނަށް، ކީރިތި ޤުރްއާން ބަލައިގެން ކިޔަވަން ދަސްކުރަން އުނދަގޫވުމަކީ، ހަމައެކަނި މިހާރު ދިމާވެގެން އުޅޭ މައްސަލައެއް ނޫނެވެ. އެއީ ކީރިތި ޤުރްއާން ބާވައިލެއްވުނު ޒަމާނުން ފެށިގެން ވެސް، ކުރިމަތިވެފައި އޮތް ބޮޑު މައްސަލައެކެވެ. އެ ޒަމާނުގައި، އެމައްސަލަ ދިމާވީ އެއްވެސް ގޮތަކަށް އެއްވެސް ބަހަކުން، ލިޔަންކިޔަން ނޭނގޭ މީހުންނަށެވެ. ނަމަވެސް މި ޒަމާނުގައި، އެ މައްސަލަ ދިމާވެފައިވަނީ، އަމިއްލަ ބަހުން ވިޔަސް، ލިޔަންކިޔަން އެނގޭ ޢަރަބި ނޫން މީހުންނަށެވެ. އެހެން ހުރިހާ ބަހަކުން ލިޔަން ކިޔަން އެނގޭ އިރުވެސް، ކީރިތި ޤުރްއާން ބަލައިގެން ކިޔަވަން ނުފަރިތައެވެ. އެއީ ކީރިތި ޤުރްއާނަށް، އިސްކަންދެވޭ މިންވަރު، ވަރަށް ދަށްކަމުގެ ޢަލާމާތެކެވެ.
ކީރިތި ޤުރްއާން ބަލައިގެން ކިޔަވަން ދަސްކުރުމުގައި، ދިމާވާ އެކިއެކި މައްސަލަތައް ޙައްލުކުރުމަށް، ނުވަތަ ދަތިކަންކަން ފަސޭހަކޮށް ދިނުމަށް، އެކި ދުވަސްވަރު އެކި ފިޔަވަޅުތައް އެޅުނެވެ. ކީރިތި ޤުރްއާނުގެ ރަސްމަށް، ގެނެވުނު ތަރުތީބީ ބަދަލުތަކަކީ ވެސް އެކަމުގެ ހެއްކެކެވެ.
ކީރިތި ޤުރްއާން ކިޔަވަން ދަސްކުރާ ދަރިވަރުންނަށް، މިޒަމާނުގައި ބަލައިގެން ކިޔެވުމަށާއި، ދުލުގެ ޙަރަކާތަށް ނުވަތަ ދުލުގެ ފަރިތަކަމަށް ހުރަސް އެޅޭ އެންމެ ބޮޑު ސަބަބަކީ، ޓީވީ އާއި ފޯނު ނުވަތަ ޓެބްލެޓް ފަދަ ތަކެތިން، ތަފާތު ވީޑިއޯތައް ބެލުމުގައި، ގިނަ ވަޤުތު ހޭދަކުރުމެވެ. އެފަދަ މަންޒަރުތަކަކީ، ޙަރަކާތް ކުރާ މަންޒަރުތަކެވެ. އެހެންވީމަ، އެކުދިންގެ ލޮލުގެ ޙަރަކާތް ހޭނިގެންދާނީ، ޙަރަކާތް ކުރާ މަންޒަރުތަކަށެވެ. އެއީ އަލަށް އުފަންވާ ކުއްޖާގެ ލޮލުގެ ފެނުން، ޙަރަކާތްތަކަށް ހުއްޓޭ ގޮތަށެވެ. އެހެންވީމަ، ޚާއްޞަކޮށް ބޮޑުވަމުން އަންނަ ދަރިވަރުންނަށް، ކީރިތި ޤުރްއާން ބަލައިގެން ވަކި ތަރުތީބަކުން ލޯހިންގަމުން، ކިޔަވަން ދަތިވާ ސަބަބަކީ، ޓީވީ އާއި ފޯނު ނުވަތަ ޓެބްލެޓް ފަދަ ތަކެތިން، ތަފާތު ވީޑިއޯތައް މާ ގިނައިން ބެލުމެވެ.
މީގެ އިތުރުން، ޓީވީ އާއި ފޯނު ނުވަތަ ޓެބްލެޓް ފަދަ ތަކެތިން، ތަފާތު ވީޑިއޯތައް ބެލުމުގައި، ގިނަ ވަޤުތު ހޭދަކުރާ ދަރިވަރުންނަށް، ކީރިތި ޤުރްއާން ކިޔެވުމުގައި، ވަކި ތަރުތީބަކުން ދުލުގެ ޙަރަކާތް ހިންގަން، ދަތިވެގެންދާނެއެވެ. މިއީ މީގެ 17 އަހަރު ކުރިން ވެސް، އަޅުގަނޑުމެން ތަކުރާރުކޮށް ދައްކަމުން އަންނަ ވާހަކައެކެވެ. އަދި މިކަމަކީ، ފަހުގެ ހޯދުންތަކުން ވެސް ސާބިތުވެފައިވާ ކަމެކެވެ. ނަމަވެސް މި ވާހަކަތައް އަޑު އަހާނެ ޤަބޫލުކުރާ މީހުން ނިސްބަތުން ވަރަށް މަދެވެ. މީގެ ކުރިން އެ މައްސަލަ ދިމާވަނީ، ހަމައެކަނި ޓީވީގެ ސަބަބުންނެވެ. ނަމަވެސް މިހާރު އެފަދަ ވަޞީލަތްތައް ގިނަ ވެއްޖެއެވެ.
ދަރިފުޅަށް ކީރިތި ޤުރްއާން ބަލައިގެން ކިޔަވަން އުނދަގޫވުމުން، ނުވަތަ ކިޔަވަން ދަތިވުމުން، ޤުރްއާން މުދައްރިސުންނަށާއި ޤުރްއާން ކުލާސްތައް ގޯސްކުރުމަށްފަހު، އަމިއްލަ ޒިންމާތައް މަތިން ގިނަ ބެލެނިވެރިން ހަނދާން ނައްތާލައެވެ. ދެން ހަދާގޮތަކީ، ދަރިވަރުގެ އިޚްތިޔާރުން އަމިއްލައަށް ކިޔައިގަތުމަށް، މަޖުބޫރުކުރުމުގެ ބަދަލުގައި، އަވަހަށް ޚަތިމުކުރަން މަސައްކަތް ފަށަނީއެވެ. އަވަހަށް ޚަތިމުކުރުމުގެ ވިޔަފާރިކުރާ ގިނަ މީހުންގެ ބޭނުމަކީ، ދެވަނަ އަދި ތިންވަނަ ޚަތިމުކުރުމުގައިވެސް، ފައިސާ ދައްކައިގެން ނުވަތަ ރީތި ނަން ހޯދުމަށް، އެމީހުންގެ އެހީތެރިކަން ހޯދަން މަޖުބޫރުވާ ގޮތަށް، ކީރިތި ޤުރްއާން އުނގެނި ދަސްކުރުމެއް ނެތި، އަވަހަށް ޚަތިމުކޮށްދިނުމެވެ. ބެލެނިވެރިންނަށް ފެންނަނީ، ދަރިވަރުން އަވަހަށް ޚަތިމު ނިންމާތަނެވެ. ދެން ހުރި ގިނަ އުނިކަންކަން ނުފެނެއެވެ.
މީގެ އެތައް އަހަރެއް ކުރިން ފެށިގެން، ތަކުރާރުވަމުން އަންނަ ޙަޤީޤަތަކީ، ކީރިތި ޤުރްއާން އުނގެނި ދަސްކުރުމެއް ނެތި، ޚަތިމުކުރާ ދަރިވަރުންގެ ކިބާގައި، މާގިނަ މުއްދަތަކަށް، ދަސްކުރި އެއްޗެއް ހަރުލާ ނުހުންނަކަމެވެ. މިވަރަށް މިކަން ސާފުކޮށްދޭއިރުވެސް، ގިނަ ބެލެނިވެރިން އެ ގޯސްކުރަނީ، ޤުރްއާން މުދައްރިސުންނާއި ޤުރްއާން ކުލާސްތަކެވެ. ބެލެނިވެރިން ގޮތް ދޫނުކުރުމަކީ، ބެލެނިވެރިންގެ މައްސަލައެކެވެ. އަޅުގަނޑުމެންގެ މައްސަލައެއް ނޫނެވެ.
ޓީވީ އާއި ފޯނު ނުވަތަ ޓެބްލެޓް ފަދަ ތަކެތިން، ތަފާތު ވީޑިއޯތައް މާގިނައިން ބެލުމުގެ ސަބަބުން، ކީރިތި ޤުރްއާން ބަލައިގެން ކިޔެވުމަށާއި ކިޔެވުމަށް، ( ދުލުގެ ޙަރަކާތަށް ) އުނދަގޫވުމުން، ޓީވީ އާއި ފޯނު ނުވަތަ ޓެބްލެޓް ފަދަ ތަކެތިން، ތަފާތު ވީޑިއޯތައް ބެލުން މަދުކޮށް، ކީރިތި ޤުރްއާނާއެކު ގިނަ ވަޤުތު ހޭދަކުރުމަށް، ބާރު އެޅުމުގެ ބަދަލުގައި، ވިޔަފާރި ބޭނުމަށް، ދެން ބަޔަކު ފެށީ އެއަށްވުރެ މާނުރައްކާތެރި ކުޅިވަރެކެވެ.
އެއީ ކީރިތި ޤުރްއާން ބަލައިގެން ކިޔަވަން ނޭނގެނީސް، ކީރިތި ޤުރްއާން ހިތު ދަސްކުރުމެވެ. ނުވަތަ ނުބަލައި ކިޔުމެވެ. އިންސާނާގެ ޙިއްސުތައް މަސައްކަތް ކުރާ ތަރުތީބަށް ވިސްނި ކަމުގައިވިޔަސް، ބަލައިގެން ކިޔަވަން ނޭނގި، ކީރިތި ޤުރްއާން ނުބަލައި ކިޔަވަން ދަސްކުރާ މީހާ ހުންނާނީ، އަބަދުވެސް ނޭނގުމެއްގެ ތެރޭގައެވެ. އެއީ އިންސާނާގެ ޙިއްސުތައް މަސައްކަތް ކުރާ ޢިލްމީ ތަރުތީބަށް، ވިސްނި ކަމުގައިވިޔަސް، އުނިކަންކަން ގިނަ ގޮތެކެވެ.
އެހުމާއި ބެލުން އަދި ކިޔުމަކީ، ކީރިތި ޤުރްއާން އުނގެނި ދަސްކުރުމުގައި، ވަކި ނުކުރެވޭނެ އުނގެނި ދަސްކުރުމުގައި، އިޚްތިޔާރީ ޙިއްސުތަކެވެ. ކީރިތި ޤުރްއާން ކިޔަވަން ދަސްކުރުމުގައި ލާޒިމުވަނީ، އެހުމެވެ. އިވުމެއް ނޫނެވެ. ނަމަވެސް ހިތު ދަސްކުރާ ގިނަކުދިން ތިބެނީ، އިވޭ ދަރަޖާގައެވެ. ހިތު ދަސްކުރަނީ، އިވިގެން އެއްޗެއް ދަސްކުރެވޭ ގޮތަށެވެ. ކަނުލައި އަޑުއެހުމުގެ ޞިފަ ފުރިހަމަ ކުރެވޭނީ، އިޚްތިޔާރުން ބަލައިގެންނެވެ. އިޚްތިޔާރަކާ ނުލައި، ހަމައެކަނި ޤުރްއާނުގެ ދެލިގަނޑު ފެނިގެން، އެކަން ޙާޞިލެއް ނުވާނެއެވެ. އެހުމާއި ބެލުން ފުރިހަމަވުމުން، އިޚްތިޔާރުން ވަކި ތަރުތީބަކުން ކިޔަން މަޖުބޫރުވާނެއެވެ.
މި މައުޟޫޢުގައި ކަން އޮތް ގޮތް ސާފުކޮށްދިނުމަށް، އަޅުގަނޑަށް ސަތޭކަ ޞަފްޙާ ވެސް ލިޔެވިދާނެއެވެ. ނަމަވެސް އެއިން ފައިދާ ކުރާނީ، އިޚްލާޞްތެރި ބަޔަކަށެވެ. ކީރިތި ޤުރްއާނަކީ، ކުޅޭ ކުޅިވަރަކަށް ހަދާ ބަޔަކަށް، ނުވަތަ ކީރިތި ޤުރްއާނަކީ، ހަމައެކަނި މުބާރާތް ބާއްވާ މުޤައްރަރަކަށް ހަދާ ބަޔަކަށް، ކިތަންމެ ވަރަކަށް ކިޔައިދިނަސް، ޤަބޫލެއް ނުކުރާނެއެވެ.
އެހެންވީމަ ބުނަން ހެއްޔެވެ؟
ހަމައެކަނި ޤުރްއާން މުދައްރިސުންނާއި ޤުރްއާން ކުލާސްތައް ކުށްވެރި ނުކުރާށެވެ. އެގޮތަށް ވިސްނާނަމަ، ސްކޫލްތައް ކުށްވެރިކުރުން މާ އައުލާވެގެން ވެއެވެ. ހަފްތާއަކު ތިން ގަޑި ނަގައިގެން، ކުދިންނަށް ޤުރްއާން އުނގަންނައި ދެވޭނެ ހެއްޔެވެ؟ ސްކޫލްތަކުން ޢަމަލުކުރާ ގޮތުގެ ސަބަބުން، ކީރިތި ޤުރްއާން އުނގެނި ދަސްކުރުމަށް، އެކި ގޮތްގޮތުން ހުރަސް އެޅެއެވެ. އެކަމަކު އެހެން މާއްދާއަކުން، ގަނޑިއެއް މަދުވުމުން ކަންބޮޑުވާ މިންވަރާ ގާތަށް ވެސް، ބެލެނިވެރިން އެކަމާމެދު ކަންބޮޑުވެގެން ނޫޅެއެވެ. އެހެންވީމަ، އަމިއްލަ ޒިންމާތަކާމެދު ވެސް ވިސްނާލާށެވެ. ތިމާއަށް ތިމާގެ ޒިންމާތައް ފުރިހަމައަށް، ނެގޭތޯ އަމިއްލަ ނަފްސާވެސް ސުވާލުކޮށްލާށެވެ.
ލިޔުނީ:- ޝުޢައިބު ޢަލީ