ކީރިތި ޤުރްއާން ބާވައިލެއްވުނީ އަޑުތަކެއްގެ ޞިފާގައެވެ.
އެއީ ވަކި ގޮތަކަށް، ވަކި ތަރުތީބަކުން ބިނާވެފައިވާ އަޑުތަކެކެވެ. އެ އަޑުތަކުން އުފެދުނީ، މާނައެއް ދޭހަވާ ބަސްތަކެކެވެ. އެ ބަސްތައް އެކުލަވައި ގުޅުވައިލުމުން އުފެދުނީ، ފުރިހަމަ މާނައެއް ދޭހަވާ ފަދަ ޖުމުލަތަކެކެވެ. އެއީ އާޔަތްތަކެވެ.
ކިޔާކިޔުމެއްގައި ބޭނުންކުރާ އަޑުތައް، ބޭނުންކުރާނެ ގޮތާއި އެ އަޑުތައް ފުރިހަމަ ކުރަންޖެހޭ މިންވަރު، އަންގައިދެނީ ފިލިތަކުންނެވެ. އެއީ މަޚްރަޖާއި ޞިފަތަކުން ދެނެގަނެވޭނެ ކަންކަމެއް ނޫނެވެ. މަޚްރަޖާއި ޞިފަތަކުން ދެނެގަނެވޭނީ، އަކުރުގެ އަޑު ޞައްޙަކުރާނެގޮތާއި ޞައްޙަވާނެ މިންވަރެވެ.
އެހެންވީމަ، ފިލި ފުރިހަމަކުރުމުގެ ނަމުގައި، އަކުރުގެ އަޑަށް ދެމުމަކީ، ހުއްދަ ކަމެއް ނޫނެވެ. އަދި އަކުރުގެ އަޑު ފުރިހަމަކުރުމުގެ ނަމުގައި، ހުރިހާ ޙާލަތެއްގައި އެއް މިންވަރަކަށް ޞިފަތައް ދީގެން، ފިލީގެ އަޑު ކުރު ކުރުމާއި ދިގު ކުރުމަކީ ވެސް، ހުއްދަ ކަމެއް ނޫނެވެ.
މިފަދަ މަޢުލޫމާތުތަކަކީ، ޢާންމުކޮށް ތަޖުވީދު ފޮތްތަކުން ލިބޭނެ، މަޢުލޫމާތުތަކެއް ނޫނެވެ. މިއީ ޤުރްއާން އުނގަންނައިދިނުމުގައި، ލިބޭ ތަޖުރިބާގެ ސަބަބުން، އެނގި ފަހުމުވާނެ ކަންކަމެވެ.
ލިޔުނީ:- ޝުޢައިބު ޢަލީ