ކީރިތި ޤުރްއާން ކިޔެވުން ރީތިކުރުމުގައި ކިޔެވުމުގެ ވައްޓަފާޅި އާއި ރާގު

ކީރިތި ޤުރްއާން ކިޔެވުން ރީތިކުރުމުގައި ކިޔެވުމުގެ ވައްޓަފާޅި އާއި ރާގު

- ކީރިތި ޤުރްއާން ކިޔެވުން ރީތިކުރުމުގައި،
ކިޔެވުމުގެ ވައްޓަފާޅި އާއި ރާގަކީ ތަފާތު ވަކި ދެބައެކެވެ.

- ކީރިތި ޤުރްއާން ކިޔެވުން ރީތިކުރުމުގައި ކިޔެވުމުގެ
ވައްޓަފާޅި އަކީ:- ޢަރަބި
ވަންތަ ގޮތެވެ.

- ކީރިތި ޤުރްއާން ކިޔެވުން ރީތިކުރުމުގައި ރާގަކީ:- ކީރިތި ޤުރްއާނާ މުނާސަބުވާގޮތަށް،
އަޑުގެ އިޙްސާސްތަކެއް ފަދައިން އަޑުގެ ދަރަޖަތައް ތަރުތީބުކުރުމެވެ.

- ހަމައެކަނި ވަކި ރާގަކަށް ކިޔަވަން
ދަސްކޮށްގެން، ކިޔެވުމުގެ ވައްޓަފާޅި ދާއިމީ ގޮތަކަށް ދަސްނުކުރެވޭނެއެވެ.

- ވަކި ޚާއްޞަ ރާގަކަށް ކިޔަވަން
ދަސްކުރުމުން ދަސްވެގެންދާނީ، އެރާގަކަށް ޚާއްޞަ މިންވަރުގެ ވެސް ބައެކެވެ.

- އަދި ހަމައެކަނި ކިޔެވުމުގެ
ވައްޓަފާޅި ދަސްކޮށްގެން، ވަކި ޚާއްޞަ ރާގެއް ދަސްނުކުރެވޭނެއެވެ.

- ކިޔެވުމުގެ ވައްޓަފާޅި
ދަސްކުރުމުން، ހަމައެކަނި ދަސްވެގެންދާނީ، ޢަރަބި ވަންތަ ދުލުގެ ޙަރަކާތްތަކެކެވެ.

- ބައެއް މީހުންގެ ކިޔެވުމުގައި،
ވަކި ޚާއްޞަ ރާގަކަށް ކިޔަވާކަން ފާހަގަ ނުކުރެވުނަސް، ކިޔެވުމުގައި އަޑު އަހާލަން
ފަސޭހަ ރީތިގޮތެއް ހުންނަ ސަބަބަކީ، ކިޔެވުމުގައި ޢަރަބި ވައްޓަފާޅި
އެކުލެވޭތީއެވެ.

- އަދި ބައެއް މީހުންގެ
ކިޔެވުމުގައި، ވަކި ރާގަކަށް ކިޔަވާއިރުވެސް، އަޑު އަހާ މީހާއަށް، އަސަރުކުރުވާ
ފަދަ ޚާއްޞަ ޞިފަތަކެއް، ކިޔެވުމުގައި ނުހުންނަ ސަބަބަކީ، ކިޔަވާ ކިޔެވުމުގައި
ޢަރަބި ވައްޓަފާޅި ނުހުންނާތީއެވެ.

- އެހެންވީމަ ވަކި ޚާއްޞަ ރާގަކަށް،
ޤުރްއާން ކިޔަވަން ދަސްކުރުމަށްވުރެ، ޢަރަބި ވައްޓަފާޅި ދަސްކުރުން މުހިންމު
ވާނެއެވެ.

- ސަބަބަކީ ކިޔެވުމުގައި، ޢަރަބި
ވައްޓަފާޅި އެކުލެވޭނަމަ، ތަޖުވީދުގެ ހަމަތަކާ އެއްގޮތަށް ކިޔަވަން
ފަސޭހަވުމާއެކު، ރީތިކޮށް ރާގަށް ކިޔަވަން ފަސޭހަވެ، ވަކި ޚާއްޞަ ރާގުތައް ވެސް،
ދަސްކުރަން ފަސޭހަވާނެތީއެވެ.

- ނަމަވެސް ކިޔެވުމުގައި ޢަރަބި
ވައްޓަފާޅި ނެތް ނަމަ، ތަޖުވީދުގެ ހަމަތަކާ އެއްގޮތަށް ކިޔަވަން އުނދަގޫވުމާއެކު،
ރީތިކޮށް ރާގަށް ކިޔަވަން ދަތިވުމުގެ އިތުރުން، ވަކި ޚާއްޞަ ރާގުތަކަށް ކިޔަވަން
އުނދަގޫ ވެގެންދާނެއެވެ.

ކިޔެވުމުގެ ވައްޓަފާޅި
ބިނާވެފައިވާ ބައިތައް

- ކީރިތި ޤުރްއާން ކިޔެވުމުގައި
ޢަރަބި ވައްޓާފާޅި ބިނާވެފައިވަނީ މައިގަނޑު ފަސް ބައެއްގެ މައްޗަށެވެ.

1- އަޑުގައި އެކުލެވޭ ޚާއްޞަ ޢަރަބި
ވައްޓަފާޅި.

-
މިއީ އެހެން ބަހުރުވަތަކުން ވާހަކަ ދެއްކުމުގައި، ގެންގުޅޭ ފަސޭހަކަން ދޫކޮށް،
ޢަރަބި ބަހަށް ޚާއްޞަ، މުނާސަބު ޚާއްޞަ ބަދަލެއް އަޑަށް ގެނައުމެވެ.

- އިންސާނާގެ ޠަބީޢީ އަޑު އުފެދޭނީ ނޭވާ
ހޮޅީގެ މަތީ ބައިންނެވެ.

- މާނައަކީ ދެ އަޑު ނަރުގެ
ސަބަބުންނެވެ.

- ނަމަވެސް ދިވެހި ބަހުން ވާހަކަ
ދައްކާއިރު، ޠަބީޢީ އަޑު ނެރުމުގައި އަޑު ޞިފަކުރެވޭނީ، ކަރަށްވުރެ ބޭރުން،
އަނގައިގެ ބޭރަށް ވާގޮތަށް، ލުއިކަމެއް އަންނަ ގޮތަށެވެ.

- އެކަމުގެ ސަބަބުން ބައެއް ޢަރަބި
އަކުރުތައް ކިޔަން އުނދަގޫވާނެއެވެ.

- އޭގެ ބަދަލުގައި، ޢަރަބި
ވައްޓަފާޅިއާ އެއްގޮތަށް، ޤުރްއާން ކިޔަވާއިރު، ޢާންމުކޮށް އަޑު ޞިފަކުރެވޭނީ،
ނޭވާ ހޮޅީގެ މަތީބައިން އުފެދޭ އަޑެއް ގޮތަށެވެ.

- ނުވަތަ ދެ އަޑު ނަރުގެ ދެމެދުން
އުފެދޭ އަޑެއް ގޮތަށެވެ.

- އެހެންވީމަ، ޢަރަބި ވައްޓަފާޅިއާ އެއްގޮތަށް
ޤުރްއާން ކިޔެވުމުގައި، ޠަބީޢީ އަޑު ނެރުމުގައި، ބޮޑަށް ބާރުލެވޭނީ ކަރުގެ ބުޑަށެވެ.

- މިގޮތަށް ޢަރަބި ވައްޓަފާޅިއާ
އެއްގޮތަށް، ދިވެހިންނަށް އަޑު ބަދަލުކުރެވޭނީ، ކިޔަވާ ސްޕީޑު ލަސްކޮށްގެންނެވެ.

- އޭރުން ތަޖުވީދުގެ ހަމަތަކާ
އެއްގޮތަށް ޤުރްއާން ކިޔަވަން ވަރަށް ބޮޑަށް ފަސޭހަވެގެންދާނެއެވެ.

2- ޢަރަބި 28 އަކުރު އަދާކުރުމަށް
ޚާއްޞަ، ޢަރަބި ވައްޓަފާޅި.

- މިއީ އެހެން ބަހުރުވަތަކަށް ޚާއްޞަ
އަކުރުތައް ކިޔުމުގައި ގެންގުޅޭ ފަސޭހަކަން ދޫކޮށް، ޢަރަބި އަކުރުތަކުގެ އަޑު
އުފެއްދުމަށް، އެކަށީގެންވާ މިންވަރަށް ވަޤުތު ދެވޭ ގޮތަށް، ދެ އަކުރުގެ
ދެމެދުގައި، މުނާސަބު ޚާއްޞަ ލަސް ކަމެއް ގެނައުމެވެ.

- އެކަމުގެ ސަބަބުން، ޢަރަބި
އަކުރުތަކުގެ އަޑު އުފެއްދުމަށް، އެކަށީގެންވާ މިންވަރަށް ވަޤުތު ލިބި، އަކުރުގެ
އަޑު އުފައްދަން ފަސޭހަވެގެންދާނެއެވެ.

- ޢަރަބި ބައެއް
އަކުރުތައް ނުބައިކޮށް ކިޔަން މަގުފަހި ވަނީ، ކުރީގައި އޮންނަ އަކުރު ކިޔުމުގައި،
ޢަރަބި ވައްޓަފާޅި ނެތީމައެވެ.

3- ޢަރަބި 23 ވަޒަން އަދާކުރުމަށް
ޚާއްޞަ، ޢަރަބި ވައްޓަފާޅި.

- މިއީ އެހެން ބަހުރުވަތަކަށް ޚާއްޞަ
ފިލިތައް ކިޔުމުގައި ގެންގުޅޭ ފަސޭހަކަން ދޫކޮށް، ޢަރަބި ވަންތަ ޚާއްޞަ ކަމެއް
ގެނައުމެވެ.

- އެކަމުގެ ސަބަބުން، ފިލީގެ
ސަބަބުން ކިޔަން އުނދަގޫ އަކުރުތައް ވެސް ވަރަށް ބޮޑަށް ފަސޭހަވެގެންދާނެއެވެ.

- ކީރިތި ޤުރްއާނުގެ
ބައެއް ވަޒަންތައް ނުބައިކޮށް ކިޔަން މަގުފަހި ވަނީ، ކުރީގައި އޮންނަ ވަޒަން
ފުރިހަމަ ކުރުމުގައި، ޢަރަބި ވައްޓަފާޅި ނެތީމައެވެ.

4- ޢަރަބި ކަލިމަތައް ކިޔުމަށް
ޚާއްޞަ، ޢަރަބި ވައްޓަފާޅި.

- މިއީ އެހެން ބަހުރުވަތަކަށް ޚާއްޞަ
ލަފްޒުތައް ކިޔުމުގައި، ގެންގުޅޭ ފަސޭހަކަން ދޫކޮށް، ޢަރަބި ކަލިމަތަކަށް ޚާއްޞަ
މުނާސަބު ލަސް ކަމެއް ގެނައުމެވެ. އެކަމުގެ ސަބަބުން ކިޔަން އުނދަގޫ ކަލިމަތައް
ކިޔަން ފަސޭހަވެގެންދާނެއެވެ.

- ކީރިތި ޤުރްއާނުގެ ބައެއް
ކަލިމަތައް ނުބައިކޮށް ކިޔަން މަގުފަހި ވަނީ، ކުރީގައި އޮންނަ ކަލިމަ ކިޔުމުގައި،
ޢަރަބި ވައްޓަފާޅި ނެތީމައެވެ.

5- ޢަރަބި ޖުމްލަތައް ނުވަތަ
އާޔަތްތައް ކިޔުމަށް ޚާއްޞަ، ޢަރަބި ވައްޓަފާޅި.

- މިއީ އެހެން ބަހުރުވަތަކަށް ޚާއްޞަ
ޖުމްލަތައް ކިޔުމުގައި، ގެންގުޅޭ ފަސޭހަކަން ދޫކޮށް، ޢަރަބި ކަލިމަތަކަށް ޚާއްޞަ
މުނާސަބު ލަސް ކަމެއް ގެނައުމެވެ.

-
ކީރިތި ޤުރްއާނުގެ އާޔަތްތައް ނުބައިކޮށް ކިޔަން މަގުފަހިވަނީ، އާޔަތްތައް
ކިޔުމުގައި، ޢަރަބި ވައްޓަފާޅި ނެތީމައެވެ.

ތަޖުވީދުގެ ޤަޥާޢިދުތަކާއި ޢަރަބި ވައްޓަފާޅި

- ޢަރަބި ވައްޓަފާޅިއާ ނުލައި ތަޖުވީދުގެ ޤަޥާޢިދުތަކާ އެއްގޮތަށް ކިޔެވުމަކީ ވަރަށް ދަތިކަމަކަށް ވެދާނެއެވެ.

- ސަބަބަކީ ތަޖުވީދު ޢިލްމުގެ އަޞްލު ބިނާވެފައިވަނީ، ޢަރަބިބަހުގެ މައްޗަށް ކަމުގައި ވާތީއެވެ.

- ޢަރަބި ވައްޓަފާޅި ދަސްކުރުމުގެ ސަބަބުން، ތަޖުވީދުގެ ޤަޥާޢިދުތަކާ އެއްގޮތަށް ކިޔަވަން މަގުފަހިވެ ފަސޭހަވެގެން ދާނެއެވެ.

ޚުލާޞާ

- ޢަރަބި ވައްޓަފާޅި އެންމެ
ފުރިހަމައަށް ޙާޞިލްކުރެވޭނީ، ކިޔަވަން ދަސްކުރާ މީހާގެ ޠަބީޢީ ބަހުރުވައިގެ
ވައްޓަފާޅި އާއި ޢަރަބި ބަހުގެ ވައްޓަފާޅި އެނގޭ މުދައްރިސުންގެ ފަރާތުންނެވެ.

- ހަމައެކަނި ތަޖުވީދުގެ
ޤަޥާޢިދުތައް ދަސްކޮށްގެން، މި ބައިތައް އެންމެ ފުރިހަމައަށް
ޙާޞިލްނުކުރެވޭނެއެވެ.

- ސަބަބަކީ ޢާންމުކޮށް މިފަދަ
މަޢުލޫމާތުތައް ތަޖުވީދު ފޮތްތަކުގައި ނުހުންނާނެތީއެވެ.

- ތަޖުވީދު ފޮތްތަކުގެ އަޞްލު
އެކުލަވާލެވިފައިވަނީ، ޢަރަބި ބަހުން ޢަރަބި އުސްތާޒުން ކަމަށް ވާތީ، ޤުރްއާން
ކިޔަވަން ދަސްކުރުމުގައި، ޢަރަބީންނަށް ޢަރަބި ވައްޓަފާޅި އެނގުން ލާޒިމުނުވާނެތީ،
ތަޖުވީދު ފޮތްތަކުގައި، މިފަދަ މަޢުލޫމާތުތައް ހިމަނާފައި ނުވަނީއެވެ.

- އެހެންވީމަ މިފަދަ
މަޢުލޫމާތުތަކަކީ، ތަޖުރިބާގެ އަލީގައި މުދައްރިސުން ފޯރުކޮށްދޭންޖެހޭ
މަޢުލޫމާތުތަކެކެވެ.

ލިޔުނީ:- ޝުޢައިބު ޢަލީ / ކީރިތި ޤުރްއާން ކިޔެވުމުގައި އަޑާއިރާގު