އަޅުގަނޑުމެން

الحمد لله ربّ العالمين , والصلاة والسّلام على أشرف الأنبياء والمرسلين , نبينا محمد و على اله وأصحابه أجمعين .

ތަޢާރަފް

މި ވެބްސައިޓަކީ، ކީރިތި ޤުރްއާން ކިޔަވަން ދަސްކޮށްދިނުމުގެ ދާއިރާއަށް، ޚާއްޞަ ކުރެވިފައިވާ ވެބްސައިޓެކެވެ. މި ވެބްސައިޓުގެ މައިގަނޑު ބޭނުމަކީ، ކީރިތި ޤުރްއާން އުނގެނޭ ފަރާތްތަކަށާއި އުނގަންނައިދޭ ފަރާތްތަކަށް، ކީރިތި ޤުރްއާން އުނގެނުމާއި އުނގަންނައިދިނުން، ފަސޭހަކޮށްދިނުމެވެ. މި ވެބްސައިޓުގައި ހިމެނިފައިވާ މަޢުލޫމާތުތަކަކީ، ތަޖުރިބާގެ އަލީގައި، އަޅުގަނޑު އެކުލަވާލި މަޢުލޫމާތުތަކެކެވެ. އެގޮތުން މި ވެބްސައިޓުގައި ހިމެނޭ މަޢުލޫމާތުތައް، މައިގަނޑު ގޮތެއްގައި ބިނާކުރެވިފައިވަނީ ތިން ބައެއްގެ މައްޗަށެވެ.

1- ކީރިތި ޤުރްއާން ކިޔަވަންވީ ގޮތް.

2-ކީރިތި ޤުރްއާން އުނގެނެންވީ ގޮތާއި ތަރުތީބު.

3- ކީރިތި ޤުރްއާން އުނގަންނައިދޭންވީ ގޮތާއި ތަރުތީބު.

މި ވެބްސައިޓުގައި ހިމެނޭ މަޢުލޫމާތުތަކަކީ، އެއްވެސް ފޮތަކުން، ނެގިފައިވާ މަޢުލޫމާތުތަކެއް ނޫނެވެ. ވީމާ އެ މަޢުލޫމާތުތަކަށް، ރިފަރެންސް ދެވިފައެއް ނުވާނެއެވެ. ރިފަރެންސް ދެވިފައިވާނީ، ތަޖުވީދުގެ ޤަޥާޢިދުތަކަށެވެ. ތަޖުވީދުގެ ޤަޥާޢިދުތައް ދިރާސާކުރުމުގައި، އަޅުގަނޑު ބޭނުން ކުރި ފޮތްތަކުގެ މަޢުލޫމާތު، ތަޖުވީދަށް ޚާއްޞަ ފޮތްތަކުގައި ހިމެނިފައިވާނެއެވެ. ނަމަވެސް ތަޖުވީދުގެ ޤަޥާޢިދުތައް ކިޔަވައިދޭނެ ގޮތާއި ތަރުތީބު އަދި އިތުރު މަޢުލޫމާތުތަކަށް، ރިފަރެންސް ދެވިފައެއް ނުވާނެއެވެ. ސަބަބަކީ އެފަދަ ހުރިހާ މަޢުލޫމާތުތަކަކީ، 2007 ވަނަ އަހަރުން ފެށިގެން، އަޅުގަނޑު ލިޔުނު، އެކި ފިލާވަޅުތަކުން ނެގިފައިވާ، މަޢުލޫމާތުތަކެއް ކަމުގައި ވާތީއެވެ. އެއީ ކީރިތި ޤުރްއާން ކިޔަވައިދިނުމުގައި، ދިމާވި އެކިއެކި މައްސަލަތަކަށް، ޙައްލު ހޯދުމަށް، އަޅުގަނޑު ކުރި މަސައްކަތްތަކުގެ ތެރެއިން ބައެކެވެ.

އަޅުގަނޑުގެ ދުޢާ އަކީ، މި ވެބްސައިޓަކީ، ކީރިތި ޤުރްއާން އުނގެނޭ އަދި އުނގަންނައިދޭ ފަރާތްތަކަށް، ބޭނުންތެރި މުހިންމު ވެބްސައިޓަކަށް ވެގެންދިއުމެވެ. آمين

ޚާއްޞަ ޝުކުރު:-

- އާމިނަތު ނިޝާނާ

- ސަނާ މުޙައްމަދު

= ޝުޢައިބު ޢަލީ ( ވެބްސައިޓުގެ މަސްއޫލުވެރިޔާ ) =

9807013