ފަސޭހަ ކަންކަން ވެސް، ބައެއް ފަހަރު ފަސޭހަކުރެވޭނީ، ވަކި ތަރުތީބަކުން އުނގެނި ދަސްކޮށްގެންނެވެ.
ކީރިތި ޤުރްއާނަކީ، ކިޔަވަން ފަސޭހަ އަދި ވިސްނައިގަންނަން ފަސޭހަ ފޮތެކޭ ބުނުމުން، ބައެއް މީހުން އެކަމާ އިންކާރު ކުރެއެވެ. އެގޮތަށް އެ ދިމާވަނީ، ބައެއް މީހުން، ކަންކަން ފަސޭހަވުން، މާނަކުރާ ގޮތުގެ ސަބަބުންނެވެ. ކަންކަން ފަސޭހަވުން ބެހެނީ، ދެ ބަޔަކަށެވެ.
1- އެކަމެއް ފެށުމުގެ ކުރިން ވެސް ފަސޭހަ ކަންކަން.
2- އެކަމެއް ފެށުމަށްފަހު މަޑުމަޑުން ފަސޭހަކުރެވޭ ކަންކަން.
ގިނަ މީހުން، ކަންކަން ފަސޭހަވުން މާނަކުރަނީ، ފެށުމުގެ ކުރިން، ކަންކަން ފަސޭހަ ވުމަށެވެ. ފަސޭހަވުން މާނަކުރުމުގައި، ހުރިހާ ޙާލަތެއްގައި، މިގޮތަށް މާނަކުރުމަކީ، އެއްގޮތަކަށް ވެސް ރަނގަޅު ގޮތެއް ނޫނެވެ. ޚާއްޞަ ނުވަތަ މުހިންމު އަދި އެކަމަކުން ބޮޑެތި ފައިދާތަކެއް ލިބޭ، ކޮންމެ ކަމެއް ވެސް، ފަސޭހަވަމުންދާނީ، މަޑުމަޑުންނެވެ. ހުރިހާ ޙާލަތެއްގައި، ހުރިހާ އެންމެންނަށް، އެފަދަ ކަންކަން، ފެށުމުގެ ކުރިން ފަސޭހަ ނުވެދާނެއެވެ.
ކީރިތި ޤުރްއާން ކިޔެވުމަކީ، ވަރަށް ފަސޭހަ ކަމެކެވެ. މާނައަކީ، ކީރިތި ޤުރްއާން ކިޔަވަން ދަސްކުރަންޖެހޭ ގޮތަށް، އަދި ކިޔަވަން ދަސްކުރަންޖެހޭ ތަރުތީބުން ދަސްކޮށްފިނަމަ، ފަސޭހަވާނެ ވާހަކައެވެ. ކީރިތި ޤުރްއާން ކިޔެވުމަކީ، ވަރަށް ފަސޭހަ ކަމެކޭ ބުނާބަހުގެ މާނައަކީ، އުނގެނި ދަސްނުކުރާ މީހާއަށް، ނުވަތަ ފަރުވާ ކުޑަކުރާ މީހާއަށް، ކީރިތި ޤުރްއާން ކިޔަވަން ފަސޭހަވާނެ ވާހަކައެއް ނޫނެވެ.
އެހެންވީމަ، ކީރިތި ޤުރްއާނުގެ ދާއިރާއަށް ބޭނުންވަނީ، ހަމައެކަނި ޤުރްއާން ކިޔަވާނެ ގޮތް ބުނެދޭ ފޮތްތަކެއް ނޫނެވެ. އޭގެ ބަދަލުގައި، ކިޔަވަން ދަސްކުރާނެ ގޮތާއި ތަރުތީބު، ބުނެދޭ ފޮތްތައް ވަރަށް މުހިންމެވެ. ޚާއްޞަކޮށް ޢަރަބި ނޫން މީހުންނަށެވެ. ސަބަބަކީ ކިޔަވަން ދަސްކުރާނެ ގޮތާއި ތަރުތީބު ބުނެ ނުދެވޭނަމަ، މީސްތަކުންގެ ތެރެއިން ގިނަ ބަޔަކަށް، ކީރިތި ޤުރްއާން ކިޔަވަން ދަސްކުރުމަކީ، ވަރަށް އުނދަގޫ ކަމަކަށްވެ، ކުރިއަށް ދާންވީ މަގު އެފަދަ މީހުންނަށް ބަންދުވެދާނެތީއެވެ.
މިއީ ދިވެހި ރާއްޖެއަށް ކުރިމަތިވެފައިވާ، އެންމެ ބޮޑު އެއް މައްސަލައެވެ. ޤުރްއާނުގެ ދާއިރާއިން، އަޅުގަނޑުގެ މަސައްކަތްތައް ބިނާކުރީ، ޤުރްއާން ކިޔަވަންޖެހޭ ގޮތް ބުނެދިނުމާއެކު، ޤުރްއާން ކިޔަވަން ދަސްކުރަން ޖެހޭ ގޮތާއި ތަރުތީބު ދިވެހިންނަށް ޚާއްޞަވާ ގޮތަށް، ނުވަތަ ޢަރަބި ނޫން މީހުންނަށް ޚާއްޞަވާ ގޮތަށް ބުނެދިނުމަށެވެ. އެކަން ވަރަށް ފުރިހަމައަށް ކާމިޔާބު ވެއްޖެއެވެ. الحمد لله
ލިޔުނީ:- ޝުޢައިބު ޢަލީ