މިއީ އަޅުގަނޑުމެން އެންމެން ވެސް ވިސްނާލަން ޖެހޭ ކަމެކެވެ.
ކީރިތި ޤުރްއާނަކީ ޚާއްޞަ ފޮތެކެވެ. ސަބަބަކީ އެއީ މާތްﷲ ގެ ކީރިތި ކަލާމްފުޅު ކަމުގައިވާތީއެވެ. ވީމާ
– ކީރިތި ޤުރްއާން ކިޔަވައިދޭ މާޙައުލަކީ، ޚާއްޞަ މާޙައުލަކަށް ވާން ޖެހެއެވެ.
– ކީރިތި ޤުރްއާން ކިޔަވައިދޭ މުދައްރިސުންނަކީ، ޚާއްޞަ ބަޔަކަށް ވާންޖެހެއެވެ.
– ކީރިތި ޤުރްއާން ކިޔަވާ ވަޤުތަކީ، ޚާއްޞަ ވަޤުތަކަށް ވާން ޖެހެއެވެ.
ދަރިވަރުންގެ ހިތުގައި، މި ޚާއްޞަކަން ނުއުފައްދައި، ހަމައެކަނި ކީރިތި ޤުރްއާން ކިޔަވައި ދިނުމަކުން، އެއްވެސް ފައިދާއެއް ނުކުރާނެއެވެ. އެހެން މާއްދާތައް ކިޔަވައިދޭ މުދައްރިސުން، ޑާންސް ކުރަމުން، ދުވަމުން ތެޅެމުން ފޮޅެމުން ކިޔަވައިދޭ ގޮތަށް، ކީރިތި ޤުރްއާން ކިޔަވައިދޭ މުދައްރިސުން ވެސް، ޤުރްއާން ކިޔަވައިދޭން އުޅޭނަމަ، ކީރިތި ޤުރްއާނުގެ ޚާއްޞަކަން، ދަރިވަރުންގެ ހިތުގައި ކުޑަވެގެންދެއެވެ. ތެދެކެވެ. އެހެން މާއްދާތައް ކިޔަވައި ދިނުމުގައި، ކުޅިވަރުގެ ތެރެއިން، ކިޔަވައި ދިނީމަ ދަރިވަރުން މައިތިރިކުރަން ފަސޭހަވެއެވެ. ނަމަވެސް އެއީ، ކީރިތި ޤުރްއާން ކިޔެވުން ފަދަ ޚާއްޞަ ކަމަކާ، ގުޅޭނެ މައިތިރިވުމެއް ނޫނެވެ. ނުވަތަ ބަސް އެހުމެއް ނޫނެވެ.
ކީރިތި ޤުރްއާނަށްޓަކައި މަޑުމައިތިރި ވުމަކީ، މުޅިން ތަފާތު ކަމެކެވެ. އެއީ ހަށިގަނޑުގެ ޙަރަކާތްތައް މަދުކޮށް، ހިތާއި ސިކުނޑި އަދި ދޫވެސް ބައިވެރިވާ ގޮތަށް، ގެނެވޭ ޚާއްޞަ މަޑުމައިތިރި ކަމެކެވެ. ވީމާ ޤުރްއާން މުދައްރިސުންނަކީ، ކުޅޭ ކުޅޭ ބަޔަކަށް ވެގެން ނުވާނެއެވެ. ކުޅިވަރުގެ ތެރެއިން ޤުރްއާން ކިޔަވައި ދިނުމަކީ، ކިތަންމެ މޮޅު ކަމެއް ކަމުގައި ދެކުނަސް، އެއީ ކީރިތި ޤުރްއާނުގެ ޚާއްޞަކަން ކަނޑުވައިލުމަށް، ތަޢާރަފް ކުރެވުނު ކަންކަމެވެ. ނުވަތަ އެއީ، ރަނގަޅު ނިޔަތެއްގައި ވިޔަސް، ތަޢާރަފް ކުރެވިފައިވާ ގޯސް ކަމެކެވެ. މީގެ އިތުރުން ޤުރްއާން މުދައްރިސުން، ދަރިވަރުންނާ ސަމާސާ ކުރުމުގައި ވެސް، ހައްދެއް އޮންނަން ވާނެއެވެ. މީއީ ދަރިވަރުންގެ ހިތުގައި، ކީރިތި ޤުރްއާން ޚާއްޞަ ކުރުމަށް، ކޮންމެހެން ބަދަލުކުރަންޖެހޭ ކަންކަމެވެ.
ވީމާ އެހެން މާއްދާތައް ކިޔަވައިދެވޭ މާޙައުލާއި، ކީރިތި ޤުރްއާން ކިޔަވައިދެވޭ މާޙައުލު ތަފާތުކުރަން ޖެހެއެވެ. ދަރިވަރުންނަށް ރީތިކޮށް ކިޔަވަން އެނގޭނީ، އެކުދިންގެ ހިތުގައި ކީރިތި ޤުރްއާން ޚާއްޞަކުރެވިގެންނެވެ. އެކަން ކުރުމަށްޓަކައި ސްކޫލްތަކުގައިވެސް، ކީރިތި ޤުރްއާން ދަރަޖަކުރާ ގޮތް، މުޅިން ބަދަލުކުރަން ޖެހެއެވެ.
މީގެ އިތުރުން ބެލެނިވެރިން ވަރަށް ބޮޑަށް ވިސްނަން ޖެހޭ ކަމެއް ފާހަގަކޮށްލާނަމެވެ.
ދަރިވަރުން ކައިރީގައި، ކިޔަވައިދޭ މުދައްރިސުންގެ ޣީބަ ބުނުމަކީ، އެ މުދައްރިސުން ކިޔަވައިދޭ މާއްދާތަކުން، ދަރިވަރުން ފޫހިކުރުވާ ސަބަބެކެވެ. ކީރިތި ޤުރްއާނަކީ، ދަރިވަރުންގެ ހިތުގައި ޚާއްޞަކުރަންޖެހޭ ފޮތެކެވެ. ނަމަވެސް ދަރިވަރުންނަށް އަޑު އިވޭ ހިސާބުގައި، މުދައްރިސުންގެ ޣީބަ ބުނުމުން، ދަރިވަރުންގެ ހިތުގައި، ކީރިތި ޤުރްއާނަށް އޮންނަ ޚާއްޞަކަން ގެއްލެއެވެ. މުދައްރިސުންގެ އަމިއްލަ ދިރިއުޅުމާ ބެހުމުގެ ޙައްޤު، އެއްވެސް ބެލެނިވެރިޔަކަށް ލިބިގެނެއް ނުވެއެވެ. އެކަން ވެގެންދާނީ، މީހެއްގެ އަބުރަށް އަރައިގަތުމާއެކު ނުވަތަ ޣީބަ ބުނެވުމާއެކު، ތިމާގެ އަތުން ތިމާގެ ދަރި ހަލާކުކުރުމަށެވެ.
މިއީ ވަރަށް ބޮޑަށް ވިސްނަން ޖެހޭ ކަމެކެވެ. މިހާރުގެ ގިނަ ދަރިވަރުން، ފިޒިކަލީ ގޮތުން، ޤުރްއާން ކިޔަވަން ޙާޒިރުވިޔަސް، ވިސްނުމުގެ ގޮތުން، ދަރިވަރުން ތިބެނީ، ކީރިތި ޤުރްއާނަށް، ޚާއްޞަ ވެފައެއް ނޫނެވެ. އެކަމުގެ ސަބަބުން، އެކަށިގެންވާ މިންވަރަށް ދަރިވަރުންނަށް ކުރިއެރުން ނުލިބޭނެއެވެ.
ލިޔުނީ:- ޝުޢައިބު ޢަލީ