ކިޔާކިޔުމެއް ދަސްކުރުމުގައި ބަހުރުވައިގެ ޠަބީޢަތާއި އެ ޠަބީޢަތް އުނގެނި ދަސްކުރުމުގައި އަންނަ މަރުޙަލާތައް
ވަކި ބަހެއް ނުވަތަ ވަކި ބަހުރުވައަކުން، ކިޔާ ކިޔުމެއް ދަސްކޮށް ފަރިތަކޮށް އާދަވުމަށް ބޭނުންވާނަމަ، އެންމެ ފުރަތަމަ ކަމަކަށް ކުރަންޖެހޭ ކަމަކީ، އެބަހެއް ނުވަތަ ބަހުރުވައެއްގެ ޠަބީޢަތް، ދަސްކޮށް ފަރިތަކޮށް އާދަކުރުމެވެ. ކޮންމެ ބަހުރުވައެއްގެ ވެސް ޠަބީޢަތަކީ، ބޭނުންކުރާ އަޑު ތަކާއި ފިލި ތަކެވެ. ނުވަތަ ވަޒަންތަކެވެ.
ކީރިތި ޤުރްއާން ކިޔަވަނީ ޢަރަބި ބަހުންނެވެ. ވީމާ ޤުރްއާން ކިޔަވަން ދަސްކުރުމުގައި، ބަހުގެ ނުވަތަ ބަހުރުވައިގެ ޠަބީޢަތް އުނގެނުމުގައި 3 މަރުޙަލާއެއް އަންނާނެއެވެ.
1- ދަސްކުރާ މަރުޙަލާ:- މިއީ އަކުރު ފިލި އަދި ކަލިމަ ދަސްކުރާ މަރުޙަލާއެވެ.
2:- ފަރިތަކުރާ މަރުޙަލާ:- މިއީ ސޫރަތް ފަށައިގަންނަ މަރުޙަލާ.
3- އާދަކުރާ މަރުޙަލާ:- މިއީ ކީރިތި ޤުރްއާނުގެ ސޫރަތްތައް ތަރުތީބުން ކިޔަވަން ދަސްކުރާ މަރުޙަލާއެވެ.
– ނޯޓް :- މި 3 މަރުޙަލާގައި ވެސް، ދަސްކޮށް ފަރިތަކޮށް އަދި އާދަކުރާ މަރުޙަލާތައް އަންނާނެއެވެ.
ކީރިތި ޤުރްއާން ކިޔަވަން ދަސްކުރާ މީހާ، އެންމެ ފުރަތަމަ އަދި އެންމެ ބޮޑަށް ފަރިތަވާން ޖެހޭނީ، ޢަރަބި ބަހުގެ އަޑުތަކާއި ފިލިތައް ނުވަތަ ވަޒަންތަކަށެވެ. އަދި އެބައިތަކަކީ، ދާއިމީކޮށް މުރާޖަޢާ ކުރެވެން ޖެހޭ ބައިތަކެކެވެ. އެކަން އެންމެ ފަސޭހައިން، އެންމެ ފުރިހަމައަށް ކުރެވޭނީ، އުނގެނޭ މަރުޙަލާގައި، ޚާއްޞަ މާއްދާއެއް ނުވަތަ ތަމްރީނެއް، އެކަމަށް ޚާއްޞަކޮށްގެންނެވެ. އެއީ توضيح ކުރުމެވެ.
ކީރިތި ޤުރްއާން ކިޔަވަން، ދަސްކުރަން އަންނަ ގިނަ މީހުން، އެންމެ ފުރަތަމަވެސް ބޭނުންވަނީ، އަވަހަށް ސޫރަތްތައް ކިޔަން ފަށައި އަވަހަށް ޚަތިމުކުރާށެވެ. އެކަމަކު އެފަދަ ގިނަ މީހުން، ޢަރަބި ބަހުގެ ޠަބީޢަތަށް ވަރަށް ނުފަރިތައެވެ. ނަމަވެސް، އެފަދަ ބައިތަކަކީ، އެއީ ކުޑަކުދިން ދަސްކުރާ ބައިތަކެއް ކަމަށާއި، އެބައިތައް ދަސްކޮށް ފަރިތަކޮށް އާދަކުރުމަށް، ކިޔާގޮތްތަކަކީ ވެސް، ކުޑަކުދިން ކިޔުމަށް ޚާޢްޞަ ގޮތްތަކެއް ކަމުގައި ބުނެ، އެކަމަށް ފަރުވާ ކުޑަކުރެއެވެ. ހިތާމައަކީ، އަޅުގަނޑުމެންގެ ތެރެއިން ގިނަ ޤުރްއާން މުދައްރިސުން ވެސް މިފަދަ ކަންކަމަށް ކޮށި ވުމެވެ.
އެއީ ކުޑަކުދިން ދަސްކުރާ ބައިތަކެއް ކަމަށާއި، އެބައިތައް ދަސްކޮށް ފަރިތަކޮށް އާދަކުރުމަށް، ކިޔާގޮތްތަކަކީ ވެސް، ކުޑަކުދިން ކިޔުމަށް ޚާޢްޞަ ގޮތްތަކެއް ކަމުގައި ބުނިކަމުގައި ވިޔަސް، އެއީ ކީރިތި ޤުރްއާނުގެ ބިންގަލެވެ. އެބައިތަކަށް ނުފަރިތަވާނަމަ، ރީތި ރާގުރާގަށް ކިޔަވައިގެން، ވަނަވަނަ ޙާޞިލްކުރުމަކުން ޙަޤީޤަތުގައި މޮޅެއް ނެތެވެ.
މިފަދަ ކަންކަން ޙައްލުކުރެވޭނީ، ކީރިތި ޤުރްއާން އުނގެނެން ޖެހޭ ތަރުތީބާއި، އުނގަންނައި ދޭންޖެހޭ ތަރުތީބު، ޤާރީ ކޯސްތަކާއި ޓީޗިންގ ކޯސްތަކުގައިވެސް، ކިޔަވައި ދީގެންނެވެ. ޤުރްއާން ޓީޗިންގ ކޯސްތައް އިތުރަށް ތަރައްޤީކޮށް، ހަމައެކަނި ޤުރްއާނަށް ޚާއްޞަ ކޮށްގެންނެވެ. އަދި ބެލެނިވެރިންނަށް ވެސް މިކަމުގައި، ވާނުވާ ކިޔައިދީގެންނެވެ. ބައެއް ދަރިވަރުން ޚަތިމު ކުރަން މަސައްކަތް ކުރާއިރު، ބަހުގެ ނުވަތަ ބަހުރުވައިގެ ޠަބީޢަތަށް ފަރިތަ ނުވެއެވެ.
ޚަތިމުކުރުމުގެ އެ އާދަކާދައިގެ ސަބަބުން، ޤުރްއާން ކިޔަވައިދޭ ފަރާތްތަކުން، ވަކި ތަރުތީބަކުން ކުރާ މަސައްކަތުގެ ނަތީޖާ އެންމެ ފުރިހަމައަށް ނެރެން ވަރަށް ދަތިވެއެވެ. ބެލެނިވެރިން ވެސް ޤަބޫލުކުރަނީ، توضيح ކުރުންފަދަ ތަމްރީނުތަކަކީ، ކުޑަކުދިންނަށް ޚާއްޞަ، ތަމްރީނުތަކެއް ކަމަށެވެ. އަދި ދަރިވަރުންނަށް ވިސްނައިދެނީވެސް އެގޮތަށެވެ. ވީމާ ބެލެނިވެރިންނަކީ ވެސް ޢިލްމީ ބަޔަކަށް ހަދަން ޖެހެއެވެ. އަދި މުދައްރިސުންގެ ތެރެއިން، ކީރިތި ޤުރްއާން އުނގެނެންޖެހޭ ތަރުތީބާއި، އުނގަންނައިދޭންޖެހޭ ތަރުތީބު ދަސްނުކުރާ ފަރާތްތަކަށް، ޓީޗިންގ ލައިސަންސް ދިނުން ހުއްޓާލަން ޖެހެއެވެ.
ލިޔުނީ:- ޝުޢައިބު ޢަލީ